X.XƏLƏFOV "XƏZƏR HÖVZƏSİ REGİONUNDA ENERGETİKA TƏHLÜKƏSİZLİYİ" BEYNƏLXALQ KONFRANSINDA İŞTİRAK EDƏCƏK
Azərbaycan xarici işlər nazirinin müavini Xələf Xələfov sentyabrın 25-28-də Almaniyanın Harmiş şəhərində "Xəzər hövzəsi regionunda energetika təhlükəsizliyi" mövzusunda keçiriləcək beynəlxalq konfransda Azərbaycanı təmsil edəcək.Bu barədə Trend ə eksklüziv müsahibəsində nazir müavini özü bildirib.
Onun sözlərinə görə, konfrans elmi-praktiki xarakter daşıyır və burada heç bir siyasi qərar qəbul edilməyəcək.
Konfransın təşkilatçısı Corc Marşal Mərkəzidir.Konfransda təbii kataklizmlər, terror aktları və s. zamanı regionun energetika təhlükəsizliyinin təmin edilməsi məsələləri üzrə ümumi nəzəri müddəalara əsas diqqət ayrılacaq.Konfrans iştirakçıları həmin məsələ üzrə öz dövlətlərinin mövqeyini təqdim edəcək. X.Xələfov konfransda çıxış etməyi və Azərbaycanın mövqeyini bildirməyi planlaşdırır.
Konfransa bütün Xəzəryanı ölkələrdən, həmçinin Gürcüstan, Türkiyə, ABŞ, Böyük Britaniya və digər ölkələrdən rəsmi nümayəndə heyətləri dəvət olunub.Həmçinin NATO, ABŞ-nın Avropa komandanlığı, eləcə də ABŞ dövlət departamentinin nümayəndələri konfransın iştirakçısı olacaq.
