Fevralın 2-də Azərbaycan Xalq Cəbhəsi Partiyasının (AXCP-islahatçılar) sədri Əli Kərimli ilə Azərbaycan Milli İstiqlal Partiyasının (AMİP) sədri Əli Əliyev arasında görüş keçirilib. Trend in məlumatına görə, görüşdə ölkədəki ictimai-siyasi vəziyyət, xüsusilə də müxalifətdaxili münasibətlər müzakirə olunub. Əli Kərimli Strasburq səfəri, Avropa Şurası Parlament Assambleyasında (AŞPA) keçirilmiş dinləmələrdəki iştirakı barədə məlumat verib.
Əli Əliyevin bildirdiyinə görə, görüşdə həmçinin müxalifətin təkrar seçkilərdə iştirak edib-etməməsi, həmçinin bu düşərgədə yeni siyasi blokun yaradılması məsələləri də müzakirə olunub. Əli Əliyevin sözlərinə görə, yeni blokun yaradılması ilə bağlı bu həftə heç bir qərar qəbul edilməyəcək: "Çünki Müsavat Partiyasının fevralın 5-də Məclisinin iclasının keçirilməsini və orada təkrar seçkilərlə bağlı qərar qəbul edilməsini gözləyirik. Yeni blokun yaradılması, həmçinin hansı formatda olması Müsavat Partiyasının qərarından asılı olacaq"-deyə Əli Əliyev bildirib.
