Hakim Yeni Azərbaycan Partiyasının (YAP) 84 rayon və şəhər təşkilatından 65-də hesabat-seçki konfransları keçirilib. Bu barədə Trend ə açıqlamasında YAP mətbuat xidmətinin rəhbəri Hüseyn Paşayev məlumat verib.
H.Paşayev vurğulayıb ki, YAP-ın rayon və şəhər təşkilatlarında keçirilən konfransların fevralın sonuna qədər yekunlaşacağı gözlənilir.
"Bu konfranslar Nizamnaməyə uyğun şəkildə iki ildən bir keçirilir. YAP İdarə Heyətinin yanvarın 26-da baş tutan iclasında rayon və şəhər təşkilatlarında keçirilən konfrarslara dair məlumat dinlənildi. İclasda qeyd olundu ki, konfranslar partiya Nizamnaməsinə və İcra Aparatının qəbul etdiyi qaydalara uyğun şəkildə keçirilir. Bütövlüklə konfranslar yüksək səviyyədə baş tutub", -deyə YAP rəsmisi əlavə edib.
H.Paşayev deyib ki, indiyə qədər keçirilən konfranslar nəticəsində YAP-ın 10 rayon və şəhər təşkilatının sədri dəyişib aə onların yerinə yeni sədrlər seçiliblər.
Qeyd edək ki, YAP 1992-ci ildə Naxçıvanda yaradılıb. Partiyanın ilk sədri mərhum eks-prezident Heydər Əliyev olub. 14 ildi hakim partiya olan YAP-ın indiki sədri prezident İlham Əliyevdir.
