Azərbaycan, Bakı, 07 may / Trend , müxbir K.Zərbalıyeva/ Ali Məhkəmə "Azadlıq" qəzetinin şikayətini təmin etməyib.
Qəzetin nümayəndəsi, vəkil Elçin Sadıqov çərşənbə günü Trend a bildirib ki, Ali Məhkəmədə bu gün keçirilən prosesdə Apellyasiya Məhkəməsinin qətnaməsi qüvvədə saxlanılıb.
Müdafiə Nazirliyi ötən il "Azadlıq" qəzetinə qarşı şərəf və ləyaqətin müdafiəsi iddiası ilə Yasamal rayon məhkəməsinə müraciət edib.
Nazirlik qəzetin 14 fevral 2007-ci il tarixli sayında dərc olunmuş "Müdafiə Nazirliyi əti Ukraynadan gətirir" başlıqlı məqalə ilə bağlı məhkəməyə müraciət edib. Yasamal rayon məhkəməsi "Azadlıq" qəzetinin təkzib verməsi və 20 min manat məbləğində cərimələnməsi barədə qətnamə çıxarıb.
Apellyasiya Məhkəməsi isə cərimənin məbləğini 10 min manata endirib.
Vəkil Ali Məhkəmənin qərarından narazı olduqlarını və bu qərardan İnsan Haqları üzrə Avropa Məhkəməsinə şikayət verəcəklərini bildirib.
Müəlliflə əlaqə saxlamaq üçün elektron ünvan - [email protected]
