Azərbaycan, Bakı, 04 iyul/ Trend , müxbir E.Babayev/ Azərbaycan Mətbuat Şurasının İdarə Heyətinin gələn həftə keçiriləcək iclasında həbsdə olan 3 jurnalistin əfvi ilə bağlı məsələnin müzakirəsi gözlənilir. "Azərbaycanda hər hansı bir jurnalistin həbsdə olması bizi narahat edir və İdarə Heyətində bu istiqamətdə müzakirələr aparılacaq", bunu cümə günü Trend -a Mətbuat Şurasının sədri Əflatun Amaşov bildirib.
Trend -un arayışı: Azərbaycanda üç jurnalist - "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayev, "Azadlıq" qəzetinin baş redaktoru Qənimət Zahid və bu qəzetin əməkdaşı, satirik-jurnalist Mirzə Sakit həbsdədir.
Amaşov bildirib ki, həbsdə olan jurnalistlərin qarşıdan gələn 22 iyul - Milli Mətbuat Günü ərəfəsində əfvi üçün Azərbaycan prezidentinə müraciət edilməsi mümkündür. "Amma indidən qəti fikir söyləmək tezdir və bu, İdarə Heyətində aparılan müzakirələrdən sonra məlum olacaq", - deyən Amaşov əlavə edib ki, Azərbaycan jurnalistlərinin bu il iyun ayının 20-də keçirilən qurultayından sonra Mətbuat Şurasının İdarə Heyəti iclas keçirməyib. "Bu baxımdan ilk iclasda həm də təşkilati məsələlərə önəm veriləcək ıə Şuranın komissiyaları, əsas fəaliyyət istiqamətləri müəyyənləşəcək", - deyə o əlavə edib.
Azərbaycanın Mətbuat Şurası 2003-cü il martın 15-də jurnalistlərin I qurultayında yaradılıb. Şura yaradılandan quruma Əflatun Amaşov sədrlik edir.
Məqalə müəllifi ilə əlaqə ünvanı: [email protected]