Azərbaycan, Bakı, 16 dekabr/ Trend , müxbir C.Babayeva/ Dekabrın 20 - də Bakının ümumtəhsil məktəblərində sınaq imtahanları keçiriləcək.
"İmtahanlar martda keçiriləcək yoxlama imtahanına hazırlıq məqsədilə aparılır. İmtahanların nəticələri qiymətləndirilmir və yekun attestat qiymətinə təsiri yoxdur", - Azərbaycanın Təhsil Nazirliyinin çərşənbə axşamı yayılmış məlumatında deyilir.
Mərkəzləşdirilmiş qaydada keçirilən test yoxlama imtahanları 2009-cu ilin fevral ayında texniki peşə litseylərində, mart-aprel aylarında ümumtəhsil məktəblərində, buraxılış imtahanları isə, 2009-cu ilin iyun ayında keçiriləcək
Yoxlama imtahanın fənlər üzrə nəticələri ikinci yarımilliyin qiymətləri çıxarılarkən nəzərə alınacaq. Yekun attestat qiyməti hesablanarkən, yoxlama imtahanının nəticələri, X - XI (XII) siniflərin illik qiymətləri və buraxılış imtahanının qiymətləri nəzərə alınacaq.
Bu il mərkəzləşdirilmiş buraxılış imtahanları Azərbaycanın Təhsil Nazirliyinin tabeliyində olan bütün ümumtəhsil məktəblərini əhatə edəcək, - təhsil naziri Misir Mərdanov əvvəllər jurnalistlərə bildirib. "Buraxılış imtahanları Azərbaycanın beş regional mərkəzində təşkil ediləcək və nəticələr həmin gün açıqlanacaq", - Mərdanov deyib.
Müəlliflə əlaqə saxlamaq üçün elektron ünvan: [email protected]