Azərbaycan, Lənkəran, 11 avqust / Trend , muxbir P.Əliyeva /
Azərbaycan Dövlət Sərhəd Xidmətinin (DSX) hospitalının həkim briqadası Azərbaycanın cənubunda yerləşən rayonların əhalisinin pulsuz müayinəsini aparır.
DSX-nin Lənkəran Sərhəd Dəstəsindən çərşənbə axşamı Trend -a verilən məlumata görə, hərbi hospitalın 8 nəfərlik həkim briqadası Astara rayonunun sərhədyanı ərazidə yerləşən Pəşkəş ərazi icra nümayəndəliyinə daxil olan kəndlərin əhalisinin müayinə və müalicəsinə başlayıb.
Həkim briqadasına terapevt, cərrah, travmatoloq və digər ixtisaslaşmış həkimlər daxildir.
Əhali Sum kəndində yerləşən həkim ambulator məntəqəsində müayinədən keçirilir. Müayinəyə rayonun Lomin, Sum, Sipiyəpard, Çikəş, Vovadə, Duriyə kəndlərinin əhalisi cəlb olunub.
İndiyədək 283 nəfər müayinədən keçirilib və onlara lazımi müalicə üsulları tətbiq olunub.
Hazırda müayinələr davam edir.
DSX-nin həkim briqadası bundan öncə Qubanın Xınalıq kəndindəki kimsəsizlər üçün belə bir xeyriyyə tədbiri keçirib.
Məqalə müəllifi ilə əlaqə unvanı: [email protected]
