Azərbaycan, Bakı, 28 avqust / Trend , müxbir C.Babayeva /
Azərbaycanın ekoligiya və təbii sərvətlər naziri bəzi böyük ölkələrin Xəzər dənizinə ekoloji cəhətdən heç bir qayğı göstərməmələrindən narahatdır.
"Bəzi böyük ölkələr Xəzər dənizindən siyasi məqsədlər üçün istifadə edir, lakin ekoloji cəhətdən heç bir qayğı göstərmirlər", - Trend -un məlumatına görə, ekoligiya və təbii sərvətlər naziri Hüseyn Bağırov hakim Yeni Azərbaycan Partiyasının rəsmi saytına müsahibəsində bildirib.
Trend -un arayışı: Xəzər dənizinin sahəsi 380 min km²-dir. Xəzər dənizinin sahil xəttinin uzunluğu Azərbaycanda 955,08 km, Rusiyada 695 km, Qazaxıstanda 2320 km, Türkmənistanda 1200 km, İranda 900 km-ə yaxındır. Dünyanın bir çox ölkələri və bir çox neft-qaz şirkətləri Xəzər dənizi hövzəsindəki neft-qaz yataqları ilə maraqlanır.
Bağırovun sözlərinə görə, Xəzərin çirklənməsi Volqa çayının dənizə qovuşan yerində 80 faiz, Ural çayının dənizə qovuşan yerində 7-8 faizdir. "Bu gün Xəzərin Qazaxıstan akvatoriyasında elə neft sahələri var ki, çirkab konservasiya olunmayan quyulardan birbaşa dənizə axır. İranda dənizin sahillərində isə 14 milyon insan yaşayır və nəzərə almaq lazımdır ki, heç bir ölkədə dəniz sahilində bu qədər əhali yaşamır. Amma bu ərazilərdə heç bir təmizləyici qurğu mövcud deyil", - nazir bildirib.
Nazir Kür və Araz çaylarının Gürcüstan və Ermənistan ərazisində çirkləndiyini bildirib. "Baxmayaraq ki, bu çayların suyu bir neçə dəryaçada durulur, təmizlənir və nəticədə dənizə töklür, nazirlik bu məsələnin də qarşısının alınması üçün tədbirlər həyata keçirir", - Bağırov deyib.
Ekologiya və təbii sərvətlər naziri Xəzəryanı dövlətlər içərisində Azərbaycanın Xəzər dənizində ekoloji tarazlığın qorunub saxlanılmasında böyük layihələrlə çıxış edən yeganə ölkə olduğunu bildirib. "Prezidentin müvafiq sərəncamlarından irəli gələn məsələlərin həlli istiqamətində gündə 6140 m3 sutəmizləmə gücünə malik, beynəlxalq standartlara cavab verən modul tipli çirkab sutəmizləyici qurğuların qurulması nəticəsində Abşeron yarımadasının Bilgəh, Buzovna, Mərdəkan, Pirşağı, Nardaran və Novxanı-Sumqayıt sahilboyu ərazilərində 17 stansiya istismara verilərək "Xəzər dənizinin ekoloji mühitinin mühafizəsi sistemi" yaradılıb", - Bağırov deyib.
Məqalə müəllifi ilə əlaqə ünvanı: [email protected]