Azərbaycan, Bakı, 28 oktyabr /Trend, müxbir K.Zərbalıyeva/
Azərbaycan Konstitusiyasının qəbulunun 15 illiyi münasibətilə Bakıda beynəlxalq konfrans keçiriləcək.
Konstitusiya Məhkəməsindən cümə axşamı Trend-ə verilən məlumata görə, noyabrın 12-də keçiriləcək "İnsan hüquq və azadlıqlarının müdafiəsinin konstitusiya mexanizmi" mövzusunda beynəlxalq konfrans Avropa Şurası Venesiya Komissiyası, Almaniya Texniki Əməkdaşlıq Cəmiyyəti və ATƏT-in Bakı ofisi ilə birgə təşkil olunur.
Konfransda Almaniya, Belarus, Türkiyə, Gürcüstan, Litva, Rusiya, Qazaxıstan, Latviya, Ukrayna, Estoniya konstitusiya məhkəmələrinin sədr və hakimlərinin, İnsan Hüquqları üzrə Avropa Məhkəməsinin nümayəndəsinin iştirakı planlaşdırılır.
Azərbaycanın ilk Milli Konstitusiyası 1995-ci il noyabrın 12-də referendum yolu ilə qəbul edilib.
Konstitusiya 5 bölmə, 12 fəsil, 158 maddədən ibarətdir.
Azərbaycan Konstitusiyasına referendum yolu ilə iki dəfə dəyişiklik edilib.
