Azərbaycan, Bakı, noyabr /Trend, müxbir M.Əliyev/
Bakı-Quba magistral avtomobil yolunun kənarında əkilmiş 18 min ədəd müxtəlif ağac və kol bitkisinin 70 faizdən çoxunda bitiş alınıb. Bunu cümə günü Trend-ə Ekologiya və Təbii Sərvətlər Nazirliyinin (ETSN) mətbuat xidmətinin rəhbəri İradə İbrahimova bildirib.
"Belə yüksək göstərici havaların isti və quraq keçməsinə baxmayaraq, mütəmadi suvarma və qulluq işləri nəticəsində əldə olunub", - o bildirib.
Ağac və kol bitkiləri nazirliyin daxili imkanları hesabına 2010-cu ilin yaz mövsümündə əkilib.
İbrahimovanın sözlərinə görə, Abşeronun Zığ - Heydər Əliyev Beynəlxalq Hava Limanı magistral avtomobil yolunun ətrafında əkilən ağacların 95 faizə qədərində bitiş alınıb.
ETSN əməkdaşları tərəfindən iməcliklər keçirilərək heç bir əlavə vəsait xərclənmədən 2009-cu ilin payız və 2010-cu ilin yaz mövsümlərində Zığ - Heydər Əliyev Beynəlxalq Hava Limanı magistral avtomobil yolunun kənarında yaşıllaşdırma işləri davam etdirilib.
"2008-ci ildə salınmış 196 hektar əkin sahəsini genişləndirmək məqsədi ilə daha 8,5 hektar ərazi hamarlanıb, 416 kubmetr üzvi gübrə və münbit torpaq daşınıb, 3400 paqonmetr su borusu çəkilib və 6500 ədəd müxtəlif ağac və kol bitkisi əkilib", - İbrahimova deyib.
Azərbaycan Prezidenti İlham Əliyevin fərmanı ilə 2010-cu il "Ekologiya il"i elan edilib.