Azərbaycan, Bakı, 23 noyabr /Trend, müxbir K.Zərbalıyeva/
Azərbaycanda fəaliyyət göstərən dini saytların böyük əksəriyyətinin fəaliyyəti qənaətbəxş deyil.
Dini Qurumlarla İş üzrə Dövlət Komitəsinin (DQİDK) mətbuat xidmətinin rəhbəri Saleh Aslanov çərşənbə axşamı Trend-ə bildirib ki, Azərbaycanda 100-ə yaxın dini sayt fəaliyyət göstərir və bu saytların böyük hissəsində digər dinlərə, təriqətlərə qarşı dözümsüzlük təbliğ edən materiallar yer alır.
DQİDK-nin dini saytların fəaliyyətinə nəzarət etdiyini deyən Aslanov bildirib ki, Komitə öz səlahiyyətləri və funksiyaları çərçivəsində dini dözümsüzlüyü təbliğ edən materialların yayımlanmasının qarşısının alınması istiqamətində fəaliyyət göstərir.
Dini dözümsüzlük yayan internet saytlarının bağlanmasına gəlincə isə, mətbuat xidmətinin rəhbəri bildirib ki, indiyədək Komitə tərəfindən bağlanan sayt olmayıb.
Azərbaycan əhalisinin 96 faizi müsəlmandır və fəaliyyət göstərən dini saytların da əksəriyyəti İslam yönümlüdür.
