Azərbaycan, Bakı, 4 may /Trend, müxbir İ.İsabalayeva/
"Eurovision-2012" mahnı müsabiqəsi ilə əlaqədar Bakıdakı bəzi səhiyyə müəssisələri gücləndirilmiş rejimdə işləyəcək. Bunu cümə günü Trend-ə Bakı Baş Səhiyyə İdarəsinin rəis müavini Rauf Nağıyev deyib.
Onun sözlərinə görə, Bakı Şəhər Təcili və Təxirəsalınmaz Tibbi Yardım Stansiyası, Kliniki Tibbi Mərkəz, 2 saylı Şəhər Kliniki Uşaq Xəstəxanası, 5 saylı Şəhər Kliniki Xəstəxanasının Yanıq şöbəsi, 5 saylı Doğum Evi gücləndirilmiş iş rejimində fəaliyyət göstərəcək.
"Qonaqlardan xəstəliklə bağlı müraciətlər olsa, həmin şəxslər bu müəssisələrə aparılacaq", - Nağıyev əlavə edib.
O deyib ki, müəssisələr mayın 12-dən - "Eurovision"ın məşqləri başlayandan gücləndirilmiş rejimdə işləyəcəklər. Adıçəkilən müəssisələrdə bunun üçün lazımi şərait yaradılıb və onlar nəzarətdə saxlanılır.
Nağıyevin sözlərinə görə, müsabiqə ilə əlaqədar dövlət səviyyəsində xüsusi ştab yaradılıb.