Bakı. Trend:
Baş Prokurorluğun Elm-Tədris Mərkəzində prokurorluqda vətəndaşların qəbulu zamanı peşəkar davranışın mənəvi və psixoloji aspektləri üzrə seminar keçirilib.
Baş Prokurorluğun mətbuat xidmətindən Trend-ə verilən xəbərə görə, Baş Prokurorluğun Geniş Kollegiya iclasının müvafiq qərarının icrası məqsədilə Baş Prokurorluğun Sənədlərlə və müraciətlərlə işin təşkili idarəsinin, eləcə də müvafiq sahə üzrə yuxarı prokurorluqların işçiləri üçün carı ilin mart ayının 29-dan 31-dək əyani və distant formada “Prokurorluqda vətəndaşların qəbulu zamanı peşəkar davranışın mənəvi və psixoloji aspektləri” mövzusunda seminar keçirilib. Təlimçi qismində tədbirə Baş Prokurorluğun işçiləri ilə yanaşı, Azərbaycan Respublikası Milli Məclisinin və Ombudsman Aparatının nümayəndələri, Səhiyyə Nazirliyinin və Bakı Dövlət Universitetinin psixologiya sahəsində alimləri, eləcə də xüsusi riskli vəziyyətlərdə vətəndaşlarla ünsiyyət saxlamaq təcrübəsi olan Fövqəladə Hallar Nazirliyinin psixoloqları cəlb ediliblər. Seminar çərçivəsində dinləyicilərə vətəndaşların qəbulu zamanı etik dəyərlər və davranış standartları, xüsusi riskli vəziyyətlərdə vətəndaş qəbulunun psixoloji aspektləri, bu zaman yaranan riskli hadisələr üzrə dövlət qulluqçusunun hərəkətləri, o cümlədən intihar meyli davranışın qarşısının alınması üzrə biliklər tədris edilib. Seminar üzrə tədris tədbirləri Bakı şəhərində qulluq keçən işçilər üçün Elm-Tədris Mərkəzinin inzibati binasında, Naxçıvan Muxtar Respublikasında qulluq keçən işçilər üçün isə distant formada həyata keçirilmiş, tədbir zamanı müasir informasiya-kommunikasiya texnologiyalardan geniş istifadə edilmiş, tədris proqramında nəzərdə tutulmuş mövzular üzrə məşğələlər vaxtında və səmərəli tədris edilmiş, təcrübədə istifadə etmək üçün maraq doğuran məşğələlərin elektron mətni dinləyicilərə təqdim edilib. “Azərbaycan Respublikası Baş Prokurorluğu və Azərbaycan Respublikasının Prezidenti yanında Dövlət İdarəçilik Akademiyası arasında əməkdaşlığa dair” imzalanmış Memoranduma əsasən təcrübə mübadiləsi məqsədilə Akademiyanın Hüquq kafedrasının müəllim heyətinin üzvləri də bu seminarda müşahidəçi qismində iştirak ediblər. Seminarın yekunu üzrə müzakirə zamanı dinləyicilər əldə etdikləri bilik və bacarıqlardan, müşahidəçilər isə seçilmiş mövzulardan və onların tədrisindən razı qaldıqlarını ifadə ediblər.
