Yaxın bir neçə həftə ərzində Gəncədə də Anti-korrupsiya Hüquqi Müdafiə Mərkəzi açılacaq. Bu barədə iyulun 20-də Bakıda ilk Anti-korrupsiya Hüquqi Müdafiə Mərkəzinin açılışı mərasimi zamanı "Şəffaf Azərbaycan" təşkilatının icraçı direktoru Rəna Səfərəliyeva məlumat verib.
R. Səfərəliyeva həmçinin qeyd edib ki, AHMM-nin yaradılması layihəsi davam etdiriləcək və Gəncədən sonra Azərbaycanın cənubundakı administrativ mərkəzlərdən birində də anti-korrupsiya mərkəzinin açılacağı ehtimal edilir.
Bu mərkəzlərin iş prinsiplərinə toxunan təşkilatın icraçı direktoru qeyd edib ki, bütün sutka ərzində fəaliyət göstərəcək telefon xəğtti (088 707 07 07) vasitəsilə AHMM-nin əməkdaşları korrupsiya faktları barədə informasiyalar toplayacaq, eləcə də şikayətlərdən istifadə mexanizmi üzrə hüquq məsləhəti xidməti göstərəcəklər.
Azərbaycan ərazisindən olan bütün telefon zəngləri pulsuzdur. Konsultasiyalar AHMM-nin ştatda olan əməkdaşları tərəfindən aparılacaq.
Qeyd edək ki, Anti-korrupsiya Mərkəzi Amerikanın "Şəffaf Azərbaycan" təşkilatını dəstəkləmək məqsədilə Avrasiya və Avropada Hüquqşünaslar və Şüquqi Təşəbbüslər Asossiasiyası (AHA/MAAHT) vasitəçiliyi ilə ABŞ-ın Beynəlxalq İnkişaf Agentliyi tərəfindən yaradılıb.