Xaqani küçəsi, 33 ünvanda yerləşən qurumların nümayəndələrinin aclıq aksiyasına qoşulanlardan biri aksiyanı dayandırıb. Bu barədə Trend ə Azərbaycan Xalq Cəbhəsi Partiyasından (AXCP) bildiriblər.
Bu şəxs "Azadlıq" siyasi blokunda təmsil olan Vətəndaş və İnkişaf Partiyası (VİP) Siyasi Şurasının üzvü Araz Zeynalovdur. Verilən məlumata görə, A.Zeynalovun qan təzyiqi qalxdığına görə aksiyanı dayandırmaq məcburiyyətində qalıb. Onu VİP Siyasi Şurasının digər üzvü Hikmət Hacıyev əvəzləyib.
Qeyd edək ki, oktyabrın 30-dan başlanan aksiya Dövlət Əmlakının İdarə Edilməsi üzrə Dövlət Komitəsinin həmin ünvanda yerləşən qurumların binadan çıxarılmasına etiraz əlaməti olaraq keçirilir. Aksiyada "Azadlıq" siyasi blokunun üzvləri Azərbaycan Xalq Cəbhəsi Partiyasının iki müavini, sədrin müşaviri, Liberal Partiyası sədrinin əvəzi, Demokrat Partiyasının nümayəndəsi və Vətəndaş və İnkişaf Partiyasının nümayəndəsi iştirak edir. Aksiya AXCP-nin təşəbbüsü ilə keçirilir.
Aclıq edənlər dünən və bu gün həkim müayinəsindən keçiblər. Həkimlərin rəyinə görə, acılq edənlərin səhhətində hələ heç bir problem yoxdur.
Onu da bildirək ki, həmin ünvanda "Azadlıq" qəzeti ilə yanaşı "Bizim yol" qəzetinin redaksiyası, "Turan" İnformasiya Agentliyi, Reportyorların Azadlığı və Təhşlükəsizliyi İnstitutu, AXCP-nin qərargahı, Səbail Rayon Polis İdarəsinin sahə müvəkkilinin ofisi yerləşir.
