UNICEF Azərbaycan hökuməti ilə səyləri birləşdirməyə hazırdır
Azərbaycan, Bakı /müx. Trend S.Ağayeva / UNICEF Azərbaycanın uşaqlar üçün və uşaqların iştirakı ilə yaradılması məqsədilə Azərbaycan hökuməti, AB və Avropa Şurası ilə səylərini birləşdirməyə hazırdır. Bu barədə UNICEF-in nümayəndəliyinin rəhbəri Xana Sinqer cümə günü BMT-nin Baş Məclisinin "Uşaqlar üçün yararlı dünya" qətnaməsinin beşilliyinə həsr edilmiş konfransda çıxışı zamanı bildirib. Konfransın əsas məqsədi Azərbaycanda qətnamənin şərtlərinin icrasının müzakirəsi, həmçinin hökumətin, vətəndaş cəmiyyətinin və beynəlxalq təşkilatların ölkədə uşaqların hüquqlarının müdafiəsi və təmin edilməsinə cəlb edilməsidir.
"Avropada hazırda uşaq hüquqlarının müdafiəsi uğrunda hərəkat böyük əhəmiyyət kəsb edir. Avropa ailəsinə inteqrasiya etməkdə olan Azərbaycan geniş hüquqi bazadan və Avropanın uzunillik təcrübəsindən uşaqların hüquqlarını müdafiə etmək məqsədilə, strategiya və normaların yaradılması üçün istifadə etməlidir" - deyə UNICEF-in Azərbaycandakı nümayəndəsi bildirib.
"Uşaqlar üçün yararlı dünya" qətnaməsində bildirilir ki, yaxın zamanlarda uşaqların hərtərəfli inkişafı, ana və uşaqların müdafiəsinin siyasi, sosial-iqtisadi və hüquqi şərtlərinin yaradılması istiqamətində konkret tədbirlər görmək lazımdır. Qətnamə sağlam həyat tərzinə yardım, keyfiyyətli təhsilin təmin edilməsi, kobud rəftardan, istismardan və zorakılıqdan müdafiə, həmçinin QİÇS-ə qarşı mübarizə kimi əsas bölmələrə malikdir. Qətnamə Azərbaycan da daxil olmaqla 180 ölkə tərəfindən qəbul olunub.
