Azərbaycan, Bakı, 19 noyabr /Trend/
Bu gün Azərbaycan Premyer Liqasının XIII turuna yekun vurulub.
Trend-in məlumatına görə, "Qəbələ" evdə Gəncənin "Kəpəz" klubu ilə qarşılaşıb.
Birinci hissədə müqavimətlə üzləşən Qəbələ futbolçuları 61-ci dəqiqədə istəklərinə çatıblar - Viktor Mendi fərqlənib. Cəmi beş dəqiqə sonra Rəşad Abdullayev penalti zərbəsindən dəqiq yararlanmaqla yekun nəticəni müəyyən edib (2:0).
Turun son qarşılaşması isə Bayıl stadionunda keçirilib. Burada yerli "Rəvan" klubu paytaxtın digər komandası AZAL-ı qəbul edib.
Tərəflərin qarşılıqlı cəhdlərinə baxmayaraq, matçda ilk qol 85-ci dəqiqədə "Rəvan"ın futbolçusu Nuran Qurbanovdan gəlib - 1:0. Oyun elə bu hesabla da başa çatıb.