Azərbaycan, Bakı, 23 noyabr /Trend/
Azərbaycan Güləş Federasiyasının elan etdiyi fotomüsabiqənin qalibləri müəyyənləşib.
Federasiyadan Trend-ə verilən məlumata görə, müsabiqə 12-13 may 2012-ci il tarixdə Bakıda keçirilən sərbəst güləş üzrə Dünya Kuboku yarışı zamanı keçirilib.
Ən yaxşı fənd, ən yaxşı idmançı emosiyası, ən yaxşı məşqçi emosiyası və ən yaxşı azarkeş reaksiyası nominasiyalarında keçirilmiş müsabiqəyə müraciət edən 20-yə yaxın fotoqraf 400-ə qədər foto təqdim edib.
İki mərhələli seçim prosesindən sonra elan edilmiş nominasiyalar üzrə qaliblər müəyyənləşib.
Qaliblərin mükafatlandırılması dekabr ayında ilin yekunlarına dair təşkil olunacaq mərasimdə baş tutacaq.
