Bakı. Trend:
"Azernews" qəzetinin 12 Noyabr tarixli buraxılışında “Zəngəzur dəhlizi: İdealist təşəbbüsdən qarşısıalınmaz reallığa” sərlövhəli məqalədə bir zamanlar yalnız idealistik təşəbbüs kimi nəzərdən keçirilən Zəngəzur dəhlizi ideyasının bu gün qarşısıalınmaz məcburiyyətə çevrilməsindən bəhs olunur.
Trend-in məlumatına görə, məqalədə qeyd olunur ki, ikinci Qarabağ müharibəsindən sonra Azərbaycanın həyata keçirdiyi hüquqi və praktiki addımlar nəticəsində ölkənin əsas hissəsinin Ermənistanın cənub regionu vasitəsilə Naxçıvanla birləşməsi planı reallığa heç vaxt olmadığı qədər yaxındır.
10 Noyabrın 2020-ci il tarixində Azərbaycan, Ermənistan və Rusiya liderləri tərəfindən imzalanan üçtərəfli bəyanat Cənubi Qafqazda yeni geopolitik vəziyyət yaratdı və Zəngəzur dəhlizinə dair planlar həmin vəziyyətin tərkib hissəsidir. Bəyanatın 9-cu maddəsi Azərbaycanın bu istiqamətdəki beynəlxalq hüquqi mövqeyinin əsasını təşkil edir. Həmin maddədə “Zəngəzur dəhlizi” terminini özündə ehtiva etməsə də, Azərbaycanın qərb rayonları ilə Naxçıvan arasında kommunikasiya xətlərinin “blokdan çıxarılması” qeyd olunur. Maddənin “təyinat” üzrə izahı onu göstərir ki, 9-cu maddə digər məqsədlərlə yanaşı, məhz Zəngəzur dəhlizi boyunca ikitərəfli kommunikasiya xəttinin açılması məqsədi ilə bəyanata daxil edilib. Sözügedən müddəanın interpretasiyası ilə bağlı Ermənistan tərəfi iki dəfə geri çəkilməyə məcbur etdirilib. Regionda baş verən son hadisələr, Paşinyanın həm dəmiryolu, həm də avtomobil xətlərinin açılmasına prinsipcə razı olmasını bildirməsi, tərəflərin bir-birlərinin hava məkanlarından istifadəsinə qarşılıqlı olaraq razılıq verməsi və digər məqamlar dəhlizə dair razılaşmanın olacağına ümidləri artırır.
Zəngəzur dəhlizi mahiyyətcə Azərbaycanın planıdır. Ermənistan tərəfi dəhlizə qədər etiraz etsə də, hal-hazırda baş verən hadisələrin əsas mahiyyəti birmənalıdır: Azərbaycanın öz istəyinə nail olması qarşısıalınmazdır və Zəngəzur dəhlizi regionda gedəcək dərin inteqrasiya proseslərinin mərkəzində yer alacaq.