Bakı. Trend:
Cari ilin fevral ayının sonuna Azərbaycanda kiçik sahibkarlıq subyektlərinə verilən kreditlərin həcmi 1,489 milyard manat təşkil edib.
Trend-in Azərbaycan Mərkəzi Bankından əldə etdiyi məlumata görə, bu, yanvar ayının sonu ilə müqayisədə 51 milyon manat və ya 3,3% azdır.
Belə ki, cari ilin yanvar ayının sonunda Azərbaycanda kiçik sahibkarlıq subyektlərinə verilən kreditlərin həcmi 1,540 milyard manat idi.
Qeyd edək ki, fevralın sonunda Azərbaycanda fəaliyyət göstərən bankların biznes kredit portfelinin həcmi 14,777 milyard manat təşkil edib. Bankların biznes kredit portfeli yanvar aynın sonu ilə müqayisədə 0,5% və ya 68 milyon manat artıb. Yanvarın sonunda bankların biznes kredit portfelinin həcmi 14,709 milyard manat olub.
Xatırladaq ki, cari ilin yanvar ayının 1-nə olan məlumata görə, Azərbaycanda 12 min 26 kiçik sahibkarlıq subyekti fəaliyyət göstərir.
Kiçik sahibkarlıq subyektlərinin ən çoxu ticarət, nəqliyyat vasitələrinin təmiri sahəsində (4 min 133), ən azı isə elektrik enerjisi, qaz və buxar istehsalı, bölüşdürülməsi və təchizatı sahəsində (42) fəaliyyət göstərir.