Almatı. Trend:
Avrasiya İnkişaf Bankı (AAİB) 2026-cı il üçün Özbəkistanda maliyyələşdirilməsi nəzərdə tutulan üç əsas layihəni müəyyənləşdirib.
Trend-in xüsusi müxbiri xəbər verir ki, bu barədə AAİB İdarə heyəti sədrinin müavini Yaroslav Mandron Almatıda 2025-ci ilin yekunlarına dair mətbuat konfransında bildirib.
O qeyd edib ki, AAİB hazırda Özbəkistanda maliyyələşdirməyə yüksək hazırlıq mərhələsindədir.
“İlk növbədə bu Almalık Kombinatıdır, orada bizim investisiyaların həcmi 100–150 milyon dollar təşkil edəcək – bunu artıq müştəri ilə müzakirə etmişik. Hazırda layihəni tam maliyyələşdirmək üçün hökumətdən yekun sənəd paketini gözləyirik”, – sədr müavini bildirib.
Y. Mandronun sözlərinə görə, layihə həmçinin polimer məhsullarının istehsalı kompleksinin tikintisini əhatə edir. Bank üçün ayrıca maraq istiqaməti hava limanı infrastrukturlarının inkişafıdır – xüsusilə Buxara şəhərində hava limanının tikintisi maraq doğurur.
Xatırladaq ki, AAİB çoxtərəfli inkişaf bankıdır və məqsədi iştirakçı ölkələrin iqtisadi artımına dəstək vermək, onlar arasında ticarət-iqtisadi əlaqələri genişləndirmək, eləcə də Avrasiya məkanında inteqrasiya proseslərini investisiya fəaliyyəti vasitəsilə inkişaf etdirməkdir. AAİB-in yeddi üzvü var: Ermənistan, Belarus, Qazaxıstan, Qırğızıstan, Rusiya, Tacikistan və Özbəkistan.