Azərbaycan, Bakı / Trend / Noyabrın 7-də Türkiyə - Azərbaycan Biznes Forumu çərçivəsində, Azərbaycan Françayzinq Assosiasiyası ilə Türkiyə Françayzinq Assosiasiyası arasında Əməkdaşlıq Müqaviləsi imzalanacaq. Azərbaycan Françayzinq Assosiasiyasından verilən məlumata görə, Azərbaycan tərəfdən Azərbaycan Françayzinq Assosiasiyasının Direktorlar Şurasının sədri Elşən Musayev və Türkiyə tərəfdən Türkiyə Françayzinq Assosiasiyasının başkanı Mustafa Aydın imzalayacaqlar.
Əməkdaşlığa dair müqavilə Azərbaycanda və Türkiyədə françayzinq təcrübəsinin öyrənilməsi, effektiv inkişafı və yayılması, beynəlxalq françayzinq sisteminin yerli bazar şərtlərinə uyğunlaşdırılmasına kömək və informasiya mübadiləsinə imkan verəcək.
Azərbaycan Françayzinq Assosiasiyası 2007-ci ilin fevral ayında yaradılaraq, qeydiyyatdan keçib. Assosiasiya Rusiya , Almaniya, Ukrayna , Baltik Françayzinq Assosiasiyaları ilə əməkdaşlıq edir. Məqsədi Azərbaycanda françayzinq təcrübəsindən istifadə etməklə, xırda və orta sahibkarlığı inkişaf etdirməkdir. Assosiasiya hal-hazırda İngilis, Amerika və İtaliya şirkətlərinin Azərbayacanda françayzinq yolu ilə açılması ilə məşğuldur.