Azərbaycan, Bakı, 16 oktyabr / Trend , müxbir E.İsmayılov/ Bakı metropoliteninin yenidən qurulan "İçəri Şəhər" stansiyası noyabrın 30-da istifadəyə veriləcək. Bu barədə cümə axşamı Bakı metropolitenindəki mənbədən bildiriblər.
Əvvəllər metro stansiyasının noyabrın 8-də istifadəyə verilməsi planlaşdırılırdı. Lakin Gürcüstanın Poti limanında (Gürcüstandakı münaqişəsi ilə bağlı) vəziyyətin qeyri-stabil olması səbəbindən şüşə gümbəzin elementləri və yeni ventilyasiya sistemi Bakıya gec gətirilib.
Stansiya üçün nəzərdə tutulan yük Odessadan göndərilib. Məhz bu səbəbdən stansiya bir qdər gec istismara veriləcək.
Metal konstruksiya, şüşə və ventilyasiya sistemi Bakı metropoliteni tərəfindən elan olunan tenderdə qalib gələn İsrailin "Houri" şirkətinin istehsalıdır.
Əvvəllər "İçəri Şəhər" metro stansiyası yenidənqurma və bərpa işləri səbəbindən bağlanmışdı. Hazırda burada əsaslı təmir işləri aparılır, dəmir-beton konstruksiya şəffaf şüşə piramida ilə əvəzlənəcək. Dəmir-beton konstruksiyanın şüşə ilə əvəzlənməsində məqsəd Qədim Şəhərin qala divarlarının görünüşünü yaxşılaşdırmaqdan ibarətdir.
Məqavlə müəllifi ilə əlaqə ünvanı - [email protected]
