Azərbaycan, Bakı, 22 oktyabr/ Trend , müxbir İ.Xəlilova/ "Beynəlxalq Maliyyə Korporasiyası Azərbaycan Milli Bankı nəzdində fəaliyyət göstərən Azərbaycan İpoteka Fonduna Fondun özəl mülkiyyətə verilməsindən sonra xarici borclanmaların cəlb edilməsinə başlamağı təklif edir", - BMK - nın Azərbaycan və Mərkəzi Asiyada ipoteka kreditləşdirməsi layihəsinin eksperti Qart Bedford (Garth Bedford) bildirib.
"Mən gözləyirəm ki, Fondun BMK ilə birgə hazırlanan kommersiya əsasında gələcək fəaliyyət strategiyasına AİF-in özəlləşdirilməsi məsələsi daxil ediləcək, - Bedford bildirib. - Biz artıq bu məsələ ilə əlaqədar bəzi müzakirələr aparmışıq. Lakin yenə də Ipoteka Fondunun Səhmdar Cəmiyyətə çevrilməsi haqqında qərarı hökumət qəbul edəcək".
Onun sözlərinə görə, bu, müsbət addım olmalıdır.
"BMK, Ipoteka Fondu özəlləşdirildikdən sonra onu maliyyələşdirə bilər", - Bedford bildirib.
BMK Ipoteka Fondu ilə əməkdaşlıq niyyəti haqqında memorandum imzalayıb. Memorandumda əsas diqqət Fondun fəaliyyətinin kommersiyalaşdırılmasına, onun gələcəkdə alternativ maliyyələşdirmə mənbələrinin cəlb edilməsi onun Səhmdar Cəmiyyətə çevrilməsinə və gələcək kommersiya biznes-planının realizəsinə yönəldilib. Hazırda BMK ekspertlərinin yardımı ilə strategiya hazırlanır. Strategiyanın ilkin varinatı ay ərzində Azərbaycan tərəfinə təqdim ediləcək.
BMK ilə memorandumun əsasında donorların fondlaşdırılması üçün təkliflərin hazırlanması, məsləhətçilərin cəlb edilməsi nəzərdə tutulur. Bu mərhələdə Korporasiya layihənin təfərrüatlarının, İpoteka Fondunun Səhmdar Cəmiyyətə çevrilməsinin zaman çərçivəsinin öz əksini tapacağı daha geniş saziş imzalamağı planlaşdırır.
Ölkədə AİF-in standartları üzrə ipoteka kreditləşdirməsi 2006 - cı il martın 25 - də, sosial ipoteka fevralın 7-də başlayıb. İpoteka kreditlərinə tələbat büdcədən ayrılmış vəsaitləri ötüb və iyunun ortalarından AİF öz standartları üzrə ipoteka kreditlərinin maliyyələşdirilməsini dayandırıb. Fond 2005 - 2007 - ci ildə dövlət büdcəsindən 46 mln. manat alıb və 2008 - ci ildə daha 34 mln. manat alacaq. Fondun banklara verdiyi kreditlərin maliyyələşdirilməsinə bu vəsaitlərdən 10 mln. manat həcmində ilk tranş artıq ayrılıb. AİF standartları üzrə kredit portfeli 67,8 mln. manat təşkil edir. Bankların ümumi ipoteka portfelinin həcmi 250-300 mln. manat təşkil edir.
Oktyabrın 22 - nə olan cari mübadilə məzənnəsi -- 0,8112 AZN/USD.
Müəlliflə əlaqə saxlamaq üçün elektron ünvan: [email protected]
