Azərbaycan, Gəncə, 18 noyabr/ Trend , müxbir V.Məmmədov/ "Gəncədə daşınmaz əmlakın alqı-satqısı üzrə bir neçə məntəqənin fəaliyyəti dayandırılıb", - V.E.S. Consulting MMC - nin Gəncə filialının sədri Ceyhun Əliyev çərşənbə axşamı bildirib.
Riyeltor şirkətlərinin fəaliyətlərini dayandırmasına daşınmaz əmlakın alqı-satqısı üzrə əməliyyatların sıfıra endirilməsi səbəb olub.
"Bu əməliyyatların dayandırılmasının bir neçə səbəbi var və ilk növbədə, bu, dünya iqtisadi böhranıdır, - Əliyev vurğulayıb. - Bunu bilənlər, daşınmaz əmlakın qiymətlərinin azalmasını gözləyirlər".
Digər səbəb bankların kreditlərin verilməsini dayandırmaları olub.
"Əvvəllər daşınmaz əmlak almaq istəyənlər kredit götürürdülərsə, ipoteka kreditlərinin verilişi dayandırıldıqdan sonra belə vətəndaşların problemləri yaranıb", - Əliyev əlavə edib.
Onun sözlərinə görə, hazırda Gəncənin mərkəzində ikiotaqlı mənzilin orta qiyməti təxminən 50 - 60 min dollardır. Şəhər yaxınlığında dörd sot torpağın qiyməti 15 min dollar, şəhər kənarında isə, bir sot torpağın qiyməti 2 min dollar təşkil edir.
Trend -ın əvvəllər verdiyi xəbərə görə, paytaxtda da analoji vəziyyət yaranıb. Bakıda əksər riyeltor şirkətləri alıcı tələbatının yoxluğu ilə əlaqədar fəaliyyətlərini dayandırıblar.
Riyeltorlar hesab edirlər ki, yaxın bir neçə həftədə daşınmaz əmlakın qiymətləri daha 3-5 faiz düşəcək. Real alıcı olarsa, satıcılar qiymətləri azaltmağa hazırdırlar. Tikinti şirkətləri yeni tikilən binaların qiymətlərini azaltmaq istəməsələr də, yeni tikilən binalardakı mənzillərin satıcıları təkrar bazarda güzəştə getməli olurlar.
Müəlliflə əlaqə saxlamaq üçün elektron ünvan: [email protected]
