Azərbaycan, Bakı, 04 aprel / Trend , müxbir N.İsmayılova /
Azərbaycanın qiymətli kağızlar bazarının infrastrukturunun inkişafı çərçivəsində Azərbaycan Respublikasının Qiymətli Kağızlar üzrə Dövlət Komitəsinin (QKDK) prioritetləri sırasına Milli Depozit Mərkəzinin işinin beynəlxalq standartlara uyğunlaşdırılmasının və birja ticarət sisteminin təkmilləşdirilməsi daxildir. Bu haqda QKDK-nın sədri Rüfət Aslanlı, Avropa İttifaqı TACIS (MDB-yə Texniki Yardım) proqramı çərçivəsində "Azərbaycanda investisiya və ixrac mühitinin yaxşılaşdırılmasına dəstək" layihəsinin ekspert qrupu ilə işgüzar görüşdə məlumat verib.
Nümayəndə heyətinə Norbert Muhlenbax, Robert Hejzak və İoannis Filopoulos daxil olub.
Görüşdə, həmçinin 2010-cu ilin sonunadək icrası nəzərdə tutulmuş sözügedən layihə çərçivəsində həyata keçiriləcək tədbirlər də müəyyən edilib.
Sözügedən texniki yardım layihəsinin əsas benefisiarları ayrı-ayrı komponentlər üzrə QKDK, Bakı Fond Birjası, Azərbaycan İnvestisiya Şirkəti və Azərbaycanda İnvestisiyaların və İxracın Təşfiqi Fondudur (AZPROMO).
Layihə çərçivəsində qiymətli kağızlar bazarının inkişafı istiqamətində bir sıra istiqamətlər üzrə, xüsusilə də, qanunvericilik və tənzimləmə çərçivəsinin inkişaf etdirilməsi, QKDK-nın, Milli Depozit Mərkəzinin və Bakı Fond Birjasının institusional potensialının genişləndirilməsi, ictimai maarifləndirmə işinin gücləndirilməsi və təlim proqramlarının təşkil edilməsi üzrə tədbirlərin həyata keçirilməsi nəzərdə tutulur.
Layihə üzrə məsləhət xidmətləri tender proseduru çərçivəsində seçilmiş şort-listdəki səkkiz namizədin içərisindən seçilmiş SOFRECO (FR) - IVEX (ES) və Belgian Bankers Academy (BE) şirkətlər konsorsiumu tərəfindən həyata keçirilir.
Layihənin dəyəri 3 milyon avrodur və o, iki-üç il müddətinə hesablanıb. Ölkədə sərmayə mühitinin yaxşılaşdırılması layihəsi çərçivəsində yardım TACIS-in AZPROMO ilə işinin davamı olacaq.
Bu layihə Avropa Komissiyası tərəfindən 15 iyun 2006-cı ildə təsdiq olunaraq 2006-cı ilin işləri siyahısına salınıb. Ancaq onun maliyyə qətnaməsi 2007-ci ildə imzalanıb.
Məqalə müəllifi ilə əlaqə ünvanı: [email protected]