Azərbaycan, Bakı, 23 aprel / Trend , müxbir N.İsmayılova /
Aprelin 1-nə olan hesablamalara əsasən, Azərbaycanda rəsmi olaraq 44174 nəfər işsiz qeydiyyata alınıb ki, onun 46,2 faizini qadınlar təşkil edir. Bu barədə cümə axşamı Dövlət Statistika Komitəsindən bildiriblər. Birinci rüb ərzində Azərbaycanda işsizlərin sayı 0,7 faiz azalıb. Hesabat dövrü ərzində ölkədə işlə təmin olunanlar 4060,5 min nəfər təşkil edib. Bununla belə 1407,7 min nəfər muzdlu işçilərdir.
İstehsalatda muzdla işləyənlərin 20,5 faizi sənaye sahəsində, 5,1 faizi tikintidə, 2,8 faizi kənd və meşə təsərrüfatında, balıqçılıq sahəsində çalışır. Xidmət sahəsində işləyənlərin 25,3 faizi təhsil sahəsində, 19,4 faizi topdan və pərakəndə satışda, avtomobil, məişət əşyaları və şəxsi istifadə vasitələrinin təmiri sahəsində, 9,9 faizi səhiyyə və sosial xidmət sahəsində, 6,9 faizi nəqliyyat və rabitədə, 6,1 faizi kommunal, sosial və özəl xidmət sahəsində, 5 faizi daşınmaz əmlak əməliyyatları sahəsində, 4,4 faizi dövlət idarəçiliyi və müdafiə sahəsində, 2,5 faizi isə digər sahələrdə çalışır.
Birinci rübdə Azərbaycanda iqtisadi fəaliyyətlə məşğul olan əcnəbilərin sayı 4,9 min nəfər təşkil edib ki, bunun 1,4 min nəfəri sənayedə, 1,5 min nəfəri tikintidə, 0,6 min nəfəri daşınmaz əmlak əməliyyatları sahəsində, 0,5 mini ticarətdə, 0,4 min nəfəri təhsil sahəsində və 0,5 min nəfəri digər sahələrdə işləyir.
İşsizliyə görə müavinətin orta məbləği 144,5 manat təşkil edir.
Aprelin 23-nə olan rəsmi məzənə 0,8035 AZN/USD təşkil edir.
Məqalə müəllifi ilə əlaqə ünvanı: [email protected]