Azərbaycan, Bakı, 14 may / Trend , müxbir Ü.İsmayılova /
Azərbaycanın Daşınmaz Əmlakın Dövlət Reyestri Xidməti (DƏDRX) Dünya Bankı (DB) ilə reallaşdırılan "Daşınmaz əmlakın reyestri" birgə layihəsi çərçivəsində Abşeron rayonu və Xırdalan şəhərində qanunsuz tikililərin monitorinqini davam etdirir. Bu barədə cümə axşamı Dövlət Xidmətinin rəhbəri Arif Qaraşov bildirib.
"Monitorinqlər yerli və beynəlxalq əhəmiyyətli mühəndis-kommunikasiya xətlərinin fəaliyyət göstərdiyi ərazilərdə, sanitar və mühafizə olunan zonalarda qanunsuz obyektlərin tikintisi ilə bağlı aparılır", - deyə Qaraşov bildirib.
Onun sözlərinə görə, monitorinq zamanı yaşayış və kommersiya obyektləri də araşdırılacaq. Bütün bu tikililər və qanunsuz mənimsənilən torpaq sahələri ayrı-ayrı dərəcələrə bölünəcək.
Qaraşov bildirib ki, monitorinqin nəticələri bu tikililərin "böyük sual altında olan" gələcək taleyinin həlli üçün hökumətə təqdim olunacaq.
"Yaşayış evlərinin tikintisi üçün nəzərdə tutulan ərazidə yerləşən və bu zonanın baş planına uyğun olan obyektlər texniki və memarlıq göstəricilərindan asılı olaraq hökumətin ciddi nəzarəti altında olacaq", - deyə Qaraşov bildirib.
Azərbaycan hökuməti və DB 2007-ci ilin iyulunda daşınmaz əmlakın vahid kadastrı sistemini birgə tətbiq etmək haqqında saziş imzalayıb. Layihə dörd komponentdən ibarətdir - daşınmaz əmlakın qeydiyyatı; dövlət əmlakının idarə edilməsi və reyestri; baza xəritəçəkmə və torpaq kadastrı; treninqlər, siyasətin formalaşdırılması və layihənin idarə edilməsi. Layihənin dəyəri 38,57 mln. dollar təşkil edir. Bunun 30 mln. dolları DB kreditinin payına düşür. Kredit ehtiyatları beş il güzəştli dövr olmaqla 20 il müddətinə ayrılıb.
Məqalə müəllifi ilə əlaqə ünvanı: [email protected]