Azərbaycan, Bakı, 27 may / Trend , müxbirlər İ.Xəlilova, N.İsmayılova /
Qiymətli Kağızlar üzrə Dövlət Komitəsi (QKDK) Azərbaycanın fond bazarının təkmilləşdirilməsi üçün ölkənin Mülki Məcəlləsinə təkliflər hazırlayır.
QKDK sədri Rüfət Aslanlı çərşənbə günü bildirib ki, dəyişikliklər korporativ idarəetmə standartlarının tətbiqi üçün düzəlişlərin edilməsini nəzərdə tutan iki maddəsinə şamil olacaq. Həmçinin dünya prosesləri və tənzimçilərin məsləhətləşmələrinin yekunu üzrə konsensus nəzərə alınmaqla G-20-nin görüşündə məcəllə maddələrinin yenilənəcəyi gözlənlir.
Bununla yanaşı, məcəlləyə hazırlanması Beynəlxalq Maliyyə Korporasiyası və Azərbaycan Mərkəzi Bankının texniki yardımı ilə başa çatmaq üzrə olan yeni maddə də daxil ediləcək. Bu maddə ilə istiqrazların təminatı tənzimlənəcək.
"Bizim artıq ipoteka kağızlarının buraxılması üzərində işləməyimizə baxmayaraq, bu alət üzrə risklərin azaldılması və daha dəqiq bazar mövqeyinin təmin edilməsi məqsədi ilə qanunvericiliyə dəyişikliklərin edilməsi zəruridir", - deyə Aslanlı bildirib.
Onun sözlərinə görə, bu gün Azərbaycanda qiymətli kağızlar bazarının fəaliyyətini tənzimləyən 70-dən çox normativ-hüquq aktı var. Hazırda bu sənədlərin ekspertizası başa çatmaq üzrədir.
"Qiymətli kağızların buraxılması, onların dövriyyəsi, həmçinin dövriyyədən çıxarılmasına dair qanunverici bazaya dəyişikliklərin edilməsi qaçılmazdır və bunu edəcəyik", - deyə Aslanlı bildrib.
Onun sözlərinə görə, hazırda səhmdar cəmiyyətlərin qeydiyyat prosedurlarının əlaqələndirilməsi və qiymətli kağızların buraxılması üzrə Vergilər Nazirliyi ilə məsləhətləşmələr aparılır. Aslanlı bildrib ki, bu istiqamətdə bir sıra dəyişikliklər gözlənilir.
Məqalə müəllifi ilə əlaqə ünvanı: [email protected]