Azərbaycan, Bakı, 28 iyul / Trend , müxbir Ü.İsmayılova /
Azərbaycanın daşınmaz əmlak bazarında bu yaxınlarda ipoteka kreditləşməsinin yenidən başlanması ilə əlaqədar olan ajiotaj dayanıb. Bu barədə "MBA Group" konsaltinq şirkətinin baş direktoru Nüsrət İbrahimov deyib. Azərbaycanda ipoteka kerditlərinin verilməsi ikiillik fasilədən sonra iyun ayından bərpa olunub.
"Əgər bazarda fəallıq 20-25 iyunda birdən birə iki dəfə artmışdısa, iyulun əvvəlindən bu günədək 40 faiz düşüb", - İbrahimov deyib.
Onun sözlərinə görə, bu onunla əlaqədardır ki, məhz bu dövr ərzində "ipotekanın təsiri altında" potensial müştərilər bazara ən ucuz daşınmaz əmlak obyektlərini almaq üçün gəliblər. Ölkədə ipoteka kreditinin maksimal məbləği 50 min manatdır.
İbrahimov deyib ki, ölkənin daşınmaz əmlak bazarında qiymətlər hazırda iyunun əvvəlindəki səviyyədə qalıb. Qiymətlər ötən ilin anoloji dövründə 20 faiz, ilin əvvəlində 15, 2 faiz düşüb. Yalnız ucuz təkrar əmlak bazarında orta hesabla 3,6 faiz, bəzən isə 10 faiz artım baş verib.
Azərbaycanda iyunun 1-dən iyulun 10-dək Mərkəzi Bank yanında fəaliyyət göstərən Azərbaycan İpoteka Fondunun (AİF) xətti ilə 80 kredit verilib. Maliyyələşdirmənin ümumi həcmi 3,6 milyon manat təşkil edir. Bu gün AİF-ə 900-dən çox şəxs adi ipoteka kreditləri, təxminən 100 şəxs isə güzəştli kredit almaq üçün müraciət edib. Daxil olan müraciətlər üzrə kreditin ümumi həcmi təxminən 43 milyon manat təşkil edir.
Azərbaycan Mərkəzi Bankı yanında Azərbaycan İpoteka Fondu ikiillik fasilədən sonra iyunun 1-dən kreditləşməyə başlayıb. Fondun kredit səlahiyyətli təşkilatı 17 bankdır. 2009-cu ilə dövlət büdcəsindən fond üçün maliyyələşməyə 14 milyon manat nəzərdə tutulub.
İyulun 28-nə olan rəsmi məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]