Azərbaycan, Bakı, 28 avqust / Trend , müxbir İ.Xəlilova/
Azərbaycanda sahibkarlığın inkişafına dövlət dəstəyinin gücləndirilməsi çərçivəsində İqtisadi İnkişaf Nazirliyi investisiya layihələrinin güzəştli qaydada kreditləşdirilməsi və iş adamlarının maarifləndirilməsi üzrə tədbirlərini davam etdirir. Bununla bağlı cümə günü Aran iqtisadi rayonunda 25 tədbir keçirilib.
Nazirlik yanında Sahibkarlığa Yardım Milli Fondunun (SYMF) icraçı direktoru Şirzad Abdullayevin Saatlıda keçirilən tədbirdə qeyd etdiyi kimi, vəsaitlərin daha səmərəli yerləşdirilməsi üçün fond yeni üsullar tətbiq edir. Fond artıq ölkədə soyuducu komplekslərinin yaradılması üzrə layihələrin maliyyələşdirilməsinə başlayıb. Fond müvəkkil kredit təşkilatları vasitəsilə, Aran iqtisadi rayonu üzrə 2, Quba-Xaçmaz iqtisadi rayonu üzrə 2 və Gəncə-Qazax iqtisadi rayonu üzrə 1 investisiya layihəsi olmaqla, 5 sahibkarlıq subyektinə güzəştli kreditlər verib.
Bundan başqa, Aran, Dağlıq Şirvan, Gəncə-Qazax, Lənkəran, Şəki-Zaqatala və Yuxarı Qarabağ iqtisadi rayonları üzrə taxıl məhsullarının saxlanması və təmizlənməsi üçün hər birinin tutumu 10 min ton olan, müasir standartlara cavab verən anbar komplekslərinin yaradılması üzrə investisiya layihələrinin maliyyələşdirilməsi məqsədi ilə sahibkarlardan təkliflərin qəbuluna başlanılıb. Şirzad Abdullayev sentyabrın 17-də layihələrin elan olunacağını bildirib və sahibkarları taxıl anbarlarının yaradılmasında fəal iştiraka dəvət edib.
Tədbir çərçivəsində 8 müvəkkil kredit təşkilatı vasitəsilə Saatlı, Sabirabad, İmişli, Beyləqan, Ucar, Bərdə, Zərdab, Hacıqabul, Biləsuvar, Neftçala və Yevlax rayonlarında sənaye və kənd təsərrüfatı sahələrində fəaliyyət göstərən 100-dən çox sahibkara güzəştli kreditlər verilib. Ayrılmış güzəştli kreditlər hesabına maliyyələşdirilən layihələrin həyata keçirilməsi nəticəsində Aran iqtisadi rayonunda 100-dən artıq yeni iş yerinin yaradılması nəzərdə tutulur.
Bununla da, 2009-cu ilin ötən dövrü ərzində Sahibkarlığa Yardım Mili Fondu tərəfindən müvəkkil kredit təşkilatları vasitəsilə verilmiş kreditlərin həcmi 63,5 milyon manat təşkil edib, güzəştli kreditlər almış sahibkarlıq subyektlərinin sayı isə 1200-dən çox olub. Güzəştli kreditlər hesabına maliyyələşdirilən layihələrin həyata keçirilməsi nəticəsində 4800-dən çox yeni iş yerinin yaradılması gözlənilir.
Tədbir iştirakçıları biyan məhsulunun emalı sahəsinin yaradılması üçün 2008-ci ildə SYMF-dən güzəştli kredit almış "BMİ" MMC-də olublar. Zavodda istehsal olunan 2 növ biyan məhsulunun (biyandan hazırlanmış yarımfabrikatlar - həblər və biyan duzu) Çin Xalq Respublikası, Koreya və ABŞ-a ixrac edilməsi nəzərdə tutulur. Tədbir iştirakçıları həmçinin "NJT-2000" firması tərəfindən Saatlı rayonunda inşa edilən soyuducu anbar kompleksinə də baş çəkiblər.
Bu il Mill Fond xətti ilə 130 milyon manat güzəştli kreditin, eyni zamanda, qaytarılan vəsaitlər hesabına 50 milyon manat vəsaitin ayrılması nəzərdə tutulub. SYMF üçün dövlət büdcəsindən 80 milyon manatın ayrılması nəzərdə tutulub.
SYMF-in güzəştli kreditləri 29 müvəkkil kommersiya bankları (ölkədə 46 bank fəaliyyət göstərir), bir qeyri-bank kredit təşkilatı və dörd kredit ittifaqı vasitəsilə verilir.
Maliyyələşdirmənin hazırkı qaydalarına əsasən, müvəkkil banklar SYMF-dan bir faizlə vəsait alır, kreditlər isə 7 faizdən artıq olmayan kredit dərəcəsi ilə verilir.
Milli Fondun 2006-cı ilin dekabr ayının 28-də təsdiqlənmiş vəsaitlərin mənimsənilməsi qaydalarına əsasən, mikrokreditlərin və kiçik kreditlərin verilməsi tarixi iki il müddətinə müəyyən edilib, orta kreditlər üç il, böyük beş il, çox böyük kreditlər isə 7 il müddətinə müəyyən edilib. SYMF-in Müşahidə Şurasının qərarına əsasən, kreditin verilmə tarixinin artırılması üzrə istisnalar ola bilər. Bir sahibkar üçün kreditin maksimum həcmi üç milyon manat təşkil edir.
Ötən il maliyyələşdirilən layihələrin 78 faizindən çoxu regionların payına düşür. Layihələrin 86 faizi istehsal və emal sahələrini əhatə edib.
Avqustun 28-nə olan rəsmi məzənnə 0,8039 AZN/USD təşkil edir.
Məqalə müəllifi ilə əlaqə ünvanı: [email protected]
