Azərbaycan, Bakı, 03 sentyabr / Trend , müxbir Ü.İsmayılova /
İyulda Bakının təkrar mənzil bazarında bir kvadratmetrin qiyməti 0,8 faiz artaraq 1,345 min dollar olub. Keçən ilin iyununda isə bu rəqəm 1,334 min dollar olub. Bu barədə cümə axşamı "Əmlak bazarı iştirakçıları" İctimai Birliyindən məlumat veriblər.
İyulda təkrar mənzil bazarında mənzillərin orta qiyməti 120,4 min dollar (iyunda -4,9 faiz), otaqların orta qiyməti 47,77 min dollar (-6,8 faiz) təşkil edib. İyulda orta otaq göstəricisi 2,52 (+2 faiz) təşkil edib.
Bazarda təklif edilmiş aşağı orta qiymətli mənzillərin payı 59,7 faiz təşkil edib. İyunda bu rəqəm 62,4 faiz olub. Orta qiymətin əhəmiyyətli dərəcədə artımı Bakının Yasamal rayonunda müşahidə edilib - 2,4 faiz.
Keçən ay təkrar bazarda yeni tikililərin də payının artması müşahidə edilib - 54,7 faiz. Təkrar bazarda leninqrad layihəli - 13,7 faiz, stalin layihəli - 7,6 faiz, eksperimental layihəli - 8 faiz, xruşovka layihəli - 4,6 faiz, arxitektura layihəli - 2,5 faiz, fransız layihəli - 1,8 faiz, kiyev layihəli - 3,5 faiz, alman layihəli - 1,2 faiz, minsk layihəli - 1,9 faiz, italyan layihəli mənzillərin payı isə 0,5 faiz təşkil edir.
Təkrar bazar portfelinin tərkib hissəsini Bakının Yasamal rayonundakı (26,2 faiz), Nərimanov rayonundakı (19,1 faiz), Nəsimi rayonundakı (17,9 faiz) və Xətai rayonundakı (12,9 faiz) mənzillər təşkil edir. Təkrar mənzil bazarının ümumi portfelində onların xüsusi çəkisi 76,1 faiz təşkil edib.
Təkrar mənzil bazarında alqı-satqı üzrə sövdələşmələrin bağlanma dinamikası iyuna görə 19,2 faiz artıb. Bazarda təkliflər 32 faiz artıb. Əmlakın ekspozisiya müddəti 6 gün azalaraq 105 günə çatıb. İyulda obyektlərin mədaxil əmsalı 3,9 faiz artıb.
Məqalə müəllifi ilə əlaqə ünvanı: [email protected]
