Azərbaycan, Bakı, 19 oktyabr / Trend , müxbir Ü.İsmayılova/
Azərbaycan Milli Sahibkarlar Konfederasiyası Qara dəniz İqtisadi Əməkdaşlıq Təşkilatında (QDİƏT) öz sədrliyi dövründə ölkəyə əlavə kredit ehtiyatlarını cəlb etmək məqsədi ilə Qara dəniz Ticarət və İnkişaf Bankı (QDTİB) ilə bir sıra danışıqlar aparıb. Bu barədə AMSK prezidenti Məmməd Musayev QDİƏT-in Biznes Şurasının İdarə Heyətinin Bakıda keçirilən iclasında deyib.
"Danışıqlar əsasən ölkə iqtisadiyyatının qeyri-neft sektoruna vəsaitlərin cəlb edilməsi barədə olub", - Musayev deyib.
Onun sözlərinə görə, Qara dəniz Ticarət və İnkişaf Bankı ölkə iqtisadiyyatının artımında fəal iştirak edir və yerli Access Bank-ın səhmdarlarından biri olan QDTİB 5 yerli banka kredit ayırıb.
"Biz inanırıq ki, QDTİB gələcəkdə də Azərbaycanda maliyyə əməliyyatlarını genişləndirəcək", - Musayev deyib.
Bankın hesabatına müvafiq olaraq, 2008-ci ildə QDTİB Azərbaycan üçün 13 əməliyyat bəyənib və ölkənin bankın ümumi portfelində payı 5,55 faizdir. Ümumilikdə bank tərəfindən dəyəri 973,5 milyon SDR olan 100 əməliyyat bəyənilib. Onlardan dəyəri 853,9 milyon SDR olan 96 əməliyyat imzalanıb. 2008-ci ildə QDTİB tərəfindən imzalanan əməliyyatlar portfelində Azərbaycanın payı 6,33 faiz təşkil edib.
Yüksək göstəricili məlumatlara müvafiq olaraq, 2009-cu ilin əvvəlindən QDTİB Azərbaycanda 83,2 milyon dollarlıq əməliyyatlar maliyyələşdirib.
QDTİB 11 dövlət tərəfindən təsis edilib: Albaniya (2%), Azərbaycan (5%), Ermənistan (1%), Bolqarıstan (13,5%), Yunanıstan (16,5%), Gürcüstan (0,5%), Moldova (1%), Rusiya (16,5%), Rumınya (14%), Türkiyə (16,5%), Ukrayna (13,5%).
Məqalə müəllifi ilə əlaqə ünvanı: [email protected]
