Azərbaycan, Bakı, 21 noyabr / Trend , müxbir Ü.İsmayılova/
Naxçıvan Muxtar Respublikasının Dövlət Gömrük Komitəsi və Standartlaşdırma, Metrologiya və Patent üzrə Dövlət Komitəsi ilə əhalinin keyfiyyətli ərzaq məhsulları ilə təmin edilməsi üzrə aparılan birgə tədbirlər çərçivəsində 35 adda ümumi məbləği 2851 manat olan vaxtı keçmiş və istifadəsi üçün yararsız ərzaq məhsulları satışdan çıxarılaraq məhv edilib. Bu barədə DGK-dan məlumat verilib.
Dövlət Komitəsindən verilən məlumata görə, ümumi məbləği 247 manat olan 8 adda belə məhsul müvafiq ticarət strukturlarına qaytarılması üçün Bakıya göndərilib. Qalan mallar isə yandırılıb.
Məhv edilən mallar arasında xarici ölkələrin istehsalı olan şokoladlar, kekslər, peçenyelər, marmaladlar, 214 qutu meyvə şirələri, 15 qutu uşaq yeməkləri, 165 ədəd müxtəlif adda yuyucu vasitə, 185 ədəd müxtəlif markalı çaylar, yağ, mayonez, marinad, kofe və s. olub.
NMR-in gömrük-buraxılış məntəqələrində gücləndirilmiş iş çərçivəsində "donuz qripi" virusunun profilaktikası məqsədilə "Moskva-Naxçıvan" reysi ilə gələn vətəndaşların baqajından 100 kiloqramdan artıq Rusiya istehsalı olan kolbasa məhsulları və donuz piyi çıxarılaraq məhv edilib.
Ümumiyyətlə, Naxçıvan MR-in gömrük orqanları tərəfindən aparılan monitorinqlər zamanı respublikanın ticarət obyektlərindən 20 min manat məbləğində standartlara müvafiq olmayan mallar müsadirə edilib.
"Monitorinqlər nəticəsində əldə edilən faktlara əsasən, daxili bazarın qorunması və A (H1N1) virusu ilə mübarizə məqsədilə idxal edilən mallara nəzarət daha da gücləndirilib, - məlumatda deyilir. - Xüsusilə də malların keyfiyyət standartlarına və sağlamlığın müəyyən edilməsi üçün sənədlərə tələb artıb".
İstifadə müddəti az olan, həmçinin istehsal tarixi göstərilməyən malların Muxtar Respublikaya daxil olmasının qarşısını almaq üçün yeni fəaliyyət planı hazırlanıb.
Məqalə müəllifi ilə əlaqə ünvanı: [email protected]
