Özbəkistan, Daşkənd, 24 mart / Trend , müxbir D.Əzizov/
"Özkimsənaye" dövlət səhmdar şirkəti və Oman Oil Company çərşənbə axşamı strateji tərəfdaşlıq haqqında memorandum imzalayıblar. Memorandum Oman şirkətlərinin 2010-2014-cü illərdə kimya sahəsinin inkişafı üzrə ümumi dəyəri 720 milyon dollar olan dörd strateji investisiya layihəsində iştirakını nəzərdə tutur.
Memorandum Daşkənddə təşkil olunmuş Özbək-Oman biznes forumu çərçivəsində imzalanıb.
Həyata keçirilməsində "Oman Oil Company"nin iştirakı da nəzərdə tütülün layihələrin siyahısına Özbəkistanın cənubunda yerləşən Qaşqadərya vilayətindəki dəyəri 250 milyon dollar olan Dehqanabad kaliumlu gübrə zavodunun növbəti mərhələsinin tikintisi üzrə layihə, Qaşqadərya vilayətində ilkin dəyəri 200 milyon dollar olan polivinilxlorid istehsalı üzrə müştərək müəssisənin (MM) yaradılması, Nəvai vilayətində ümumi dəyəri 180 milyon dollar təşkil edən kompleks azot-fosfor-kalium gübrə istehsalının təşkil edilməsi və "FərqanəAzot" ASC bazasında dəyəri 90 milyon dollar olan dimetil efiri istehsalatının yaradılması daxildir.
İmzalanmış memoranduma əsasən, müştərək işləri əlaqələndirmək üçün ikitərəfli işçi qrupu yaradılacaq. Bu qrup hər ay iki tərəfə hesabat təqdim edəcək. Oman şirkətlərinin layihələrdə iştirakının konkret parametrlərinin müəyyən edilməsi üçün tərəflər müntəzəm görüşlər keçirməyi planlaşdırır. Yaxın zamanlardakı görüşün may ayında təşkil edilməsi nəzərdə tutulur.
Bildirildiyi kimi, Dehqanabad kaliumlu gübrə zavodunun növbəti mərhələsinin tikintisi üzrə layihənin istismara verilməsi 2014-cü ilə planlaşdırılır. Bu zavodun istehsal gücü 400 min ton kaliumlu gübrədir.
Qaşqadərya vilayətində polivinilxlorid istehsalı üzrə layihə çərçivəsində 2014-cü ilə qədər ildə 50 min ton polivinilxlorid və 32 min ton kaustik soda istehsalı gücünə malik zavodun tikintisi nəzərdə tutulub.
Azot-fosfor-kalium gübrə istehsalının təşkil edilmısi üzrə layihə 2015-ci ilədək 250 min ton gübrə istehsalına malik zavodun tikintisini nəzərdə tutur.
"FərqanəAzot" ASC bazasında dimetil efiri istehsalı üzrə layihənin həyata keçirilməsi ölkədə 100 ton alternativ növ yanacağın buraxılmasının təşkilinə imkan verir.
Memoranduma daxil olan layihələrin maliyyələşdirilməsi cəlb edilmiş birbaşa investisiyaların, xarici borcların, Özbəkistan Yenidənqurma və İnkişaf Fondunun kreditləri və Özbəkistan şirkətlərinin şəxsi vəsaiti hesabına planlaşdırılır.
Ümumilikdə, 2015-ci ilə qədər Özbəkistanın kimya sahəsinin təkmilləşdirilməsi məqsədilə ümumi dəyəri 2,062 milyard dollar olan 20 investisiya layihəsinin həyata keçirilməsi planlaşdırılır.