Azərbaycan, Bakı, 2 avqust /Trend, müxbir N.İsmayılov/
Azərbaycan və Türkiyənin gömrük orqanları arasında gələcək əməkdaşlığın genişləndirilməsi tələb olunur. Bu barədə Türkiyənin xarici ticarət məsələləri üzrə dövlət naziri Zəfər Çağlayan Bakıda Azərbaycan Dövlət Gömrük Komitəsinin sədri Aydın Əliyevlə görüşü zamanı bildirib. Məlumat DGK-nın dərc etdirdiyi "Gömrük" qəzetində qeyd olunub.
"Ölkələrimiz arasında mal dövriyyəsinin gələcəkdə genişləndirilməsi üçün geniş imkanlar var ki, buna da iki ölkənin yüksək templə inkişaf edən iqtisadiyyatı xidmət edir. Ölkələrin gömrük orqanları arasında əməkdaşlığın genişləndirilməsi də mühüm əhəmiyyət kəsb edir", - dövlət naziri vurğulayıb.
DGK sədrinin sözlərinə görə, Azərbaycanın Türkiyə ilə əlaqələri genişləndirməsi xarici iqtisadiyyat siyasətinin mühüm faktorudur və daima diqqət mərkəzindədir. Əliyev iki ölkənin gömrük orqanları arasındakı əməkdaşlıqdan razı qaldığını bildirib və bu sahədə təcrübə mübadiləsinin nəticələrinin müsbət olduğunu vurğulayıb.
Onun fikrincə, narkotik vasitələrin dövriyyəsinə qarşı mübarizə sahəsində Türkiyə təcrübəsinin tətbiqi müsbət nəticələr verib və gələcəkdə bu qarşılıqlı əməkdaşlığın genişləndirilməsinə zərurət var.
Əliyev qeyd edib ki, iki ölkə arasında mal dövriyyəsi ildən-ilə artır və gələcəkdə artım tendensiyası saxlanılacaq.
