Türkmənistan-Avstriya birgə komissiyasının tərkibi təsdiq edilib
Türkmənistan, Aşqabad, 30 avqust /Trend, müxbir H.Həsənov/
Türkmənistan Prezidenti Qurbanqulu Berdiməhəmmədov ikitərəfli iqtisadi əlaqələrin gələcək inkişafı məqsədilə Türkmənistan-Avstriya birgə komissiyasının tərkibini təsdiq edib.
Türkmənistan tərəfdən komissiyaya Ticarət-Sənaye Palatasının sədri Palvan Taqanov başçılıq edəcək.
Türkmənistan və Avstriya arasında diplomatik münasibətlər 1992-ci ilin noyabrında qurulub. Bu müddət ərzində nazirliklər, hökumətlər və dövlətlərarası səviyyədə yeddi sənəd imzalanıb. Avstriya şirkətləri kənd təsərrüfatı obyektlərinin tikintisi və yenidən qurulması sahəsində, eləcə də karbohidrogen resurslarının kəşfiyyatı və hasilatı sahəsində 20-dən çox Türkmənistan layihəsinin həyata keçirilməsində iştirak edir.
2008-ci ilin noyabrında Berdiməhəmmədovun Vyanaya baş tutan səfəri iki ölkə arasında əlaqələrə dinamika verib. Avstriya paytaxtında Prezidentin "Nabukko" konsorsiumuna daxil olan Avstriyanın neft-qaz şirkəti OMV-nin rəhbəri Volfanq Ruttensdorferlə görüşü olub.
Bu layihənin məqsədi Xəzər regionundan karbohidrogen resurslarının Avropa qitəsinə çıxarılmasından ibarətdir. Konsorsiumun tərkibinə Macarıstanın MOL, Rumıniyanın "Transgaz", Türkiyənin "Botaş" və Almaniyanın RWE şirkətləri də daxildir.
Türkmənistan uzunluğu 300 kilometr olacaq (Türkmənistan və Azərbaycan arasında Xəzərin dibi ilə) Transxəzər boru kəmərinin tikiləcəyi təqdirdə, "Nabukko" layihəsinin bir hissəsi ola bilər. "Nabukko" boru kəməri daha sonra Azərbaycan, Türkiyə, Bolqarıstan, Macarıstan və Rumıniya ərazilərindən keçərək Avstriyaya çata bilər.
"Nabukko"nun illik gücü 7,9 milyard avro dəyərində 31 milyard kubmetr qaz təşkil edə bilər. Türkmənistan rəhbərliyi "Nabukko" layihəsini ildə 10 milyard kubmetr həcmlə təmin etməyə hazır olduğunu bəyan edib.
