Azərbaycan, Bakı, 14 sentyabr /Trend, müxbir İ.Xəlilova/
Beynəlxalq Maliyyə Korporasiyası (BMK) Avropa Yenidənqurma və İnkişaf Bankı (AYİB) ilə birgə Azərbaycanın "Rabitəbank"ından pay iştirakı əldə etməyi planlaşdırır. Bu barədə BMK-nın Azərbaycandakı nümayəndəsi Aliyə Əzimova çərşənbə axşamı bildirib.
"Biz artıq bankla danışıqları başa çatdırmışıq, şərtləri və "Rabitəbank"ın səhmdar payının alınmasının son detallarını razılaşdırırıq", - Əzimova deyib.
BMK-nın Direktorlar Şurası 2010-cu il iyulun 1-də "Rabitəbank"a beş milyon dollar məbləğində maliyyə vəsaitinin verilməsini təsdiqləyib. Vəsaitin ümumi həcmindən iki milyon dollar investisiya və səhm kaplitalı kimi, üç milyon dollar isə kredit xətti şəklində verilir.
Kredit resursları kiçik və orta sahibkarlığın kreditləşdirilməsinə yönəldiləcək. BMK bankın səhm paketinin 10-15 faizinin alınması imkanlarına baxır. Korporasiyanın nümayəndəsi hələlik AYİB-in verdiyi səhm paketinin həcmini açıqlamaqdan imtina edib.
"Rabitəbank" kommersiya bankı Azərbaycanda 1993-cü ildən fəaliyyət göstərir. 2009-cu ilin sonlarına bankın aktivləri 103 milyon manat, kapitalı isə 16 milyon manat təşkil edib. Bank aktivlərinin həcminə görə ölkədə fəaliyyət göstərən banklar arasında (bu gün onların sayı 47-dir) 18-ci yeri tutur.
Hazırda bankın filial şəbəkəsi 21 filial və şöbədən ibarətdir. Onların 6-sı Bakıda, 15-si isə ölkənin regionlarında yerləşir.
"Rabitəbank" Azərbaycanda BMK-nın pay iştirakı əldə etdiyi dördüncü bankdır. Azərbaycanda xarici kaplitalla cəmi 23 bank fəaliyyət göstərir.
"Rabitəbank" BMK və AYİB ilə 1999-cu ildən əməkdaşlıq edir. Bankın nəzarət səhm paketi (86,1 faiz) Müşahidə Şurasının sədri Zakir Nuriyevə məxsusdur.
Sentyabrın 14-nə olan rəsmi məzənnə 0,8037 AZN/USD təşkil edir.
