Azərbaycan, Bakı, 7 oktyabr /Trend, müxbir N.İsmayılova/
Beynəlxalq Valyuta Fondu (BVF) 2010, 2011 və 2015-ci illərdə Azərbaycanda ÜDM-in artım proqnozlarını yüksəldib. 2010-cu ildə Azərbaycanda ÜDM-də artım əvvəlcə proqnozlaşdırılan 2,7 faizə qarşı 4,3 faiz təşkil edəcək. Bu barədə BVF-in rəsmi saytında yerləşdirilən Fondun "Dünya iqtisadiyyatının perspektivləri" məruzəsində bildirilir.
2011-ci ildə ölkədə ÜDM-in artım proqnozu 0,6 faizdən 1,8 faizədək, 2015-ci ildə isə 0,7 faizdən 0,9 faizədək qaldırılıb.
Düz bir il əvvəl - 2009-cu ilin oktyabrında BVF 2010-cu ildə Azərbaycanda iqtisadi artımı 7,4 faiz səviyyəsində proqnozlaşdırmışdı.
Digər iri beynəlxalq maliyyə institutu olan Asiya İnkişaf Bankının Azərbaycan üçün ÜDM-in artım proqnozu 2010-cu ildə 3,8 faiz, 2011-ci ildə isə 3,5 faiz təşkil edir.
Azərbaycan Dövlət Statistika Komitəsinin məlumatına görə, 2009-cu ildə ölkədə ÜDM-də artım 9,3 faiz təşkil edib, 2010-cu ildə isə ölkə hökuməti 6,8 faiz artım gözləyir.