Azərbaycan, Bakı, 8 dekabr /Trend, müxbir N.İsmayılova/
Azərbaycan Vergilər Nazirliyi Qırğızıstan İqtisadi Tənzimləmə və Xarici İşlər nazirlikləri ilə gəlir və əmlakla bağlı ikiqat vergiqoymanın ləğv edilməsi haqqında konvensiya layihəsi üzrə müzakirələr aparıb. Bu barədə Vergilər Nazirliyinin "Vergilər" qəzetində dərc edilən məlumatda deyilir.
Qırğızıstan nümayəndə heyətinin Bakıya səfəri çərçivəsində aparılan danışıqlar zamanı konvensiya layihəsinin bütün bəndləri üzrə razılıq əldə olunub.
Danışıqların yekunları üzrə Azərbycan Vergilər Nazirliyi və Qırğızıstan İqtisadi Tənzimləmə Nazirliyi arasında protokol imzalanıb.
Hazırda Azərbaycan ikiqat vergiqoymanın aradan qaldırılması haqqında sazişi 40 ölkə ilə imzalayıb. Onların 36-sı artıq qüvvəyə minib. Azərbaycan tərəfi artıq dörd sazişi təsdiq edib və sənəd qarşı tərəfin daxili prosedurlarından keçdikdən sonra qüvvəyə minəcək. Bundan başqa, artıq doqquz ölkə ilə ekspertlər səviyyəsində sazişlərin imzalanmasına dair razılıq əldə olunub, altı ölkə ilə saziş llayihələrinin razılaşdırılması davam etdirilir. Bunula yanaşı, 10-dan çox ölkə ilə bu sahədə danışıqların aparılması davam etdirilir.