Azərbaycan, Bakı, 10 yanvar /Trend, müxbir N.İsmayılova/
Azərbaycanın vergilər naziri Fazil Məmmədovun əmri ilə 2011-2015-ci illər üçün vergi orqanları tərəfindən vergiödəyicilərə göstərilən xidmətlərin inkişafı Konsepsiyası təsdiq edilib. Bu barədə bazar ertəsi nazirliyin rəsmi saytında dərc edilən məlumatda deyilir.
Azərbaycanın vergi sisteminin inkişaf istiqamətlərinin Avropa İttifaqının vergi harmoniyası və vergi inzibatçılığı üzrə qəbul edilən standartlara uyğunlaşdırılması məqsədilə ötən ilin noyabrın 3-də strateji plan təsdiq edilib. Planda vergi sisteminin həyata keçirilməsi kriteriyaları və inkişaf istiqamətləri, vergi qanunvericiliyi və inzibatçılığın təkmilləşdirilməsi kriteriyaları müəyyənləşdirilib.
Konsepsiya vergiödəyicilərə yeni səviyyədə xidmət sahəsinin inkişafını, əhatənin genişləndirilməsini və onun keyfiyyətinin artırılmasını nəzərdə tutur.
Konsepsiyanın əsas məqsədi sahibkarlığın inkişafının dəstəklənməsi və müasir informasiya texnologiyalarından istifadə etməklə vergi qanunvericiliyinə könüllü əməletmə prosesinin inkişaf etdirilməsidir.
2003-cü ildə ABŞ Dövlət Xəzinədarlığının vergi inzibatçılığı üzrə məsləhətçisinin iştirakı ilə "Vergiödəyicilərə xidmət işinin Konsepsiyası" hazırlanıb. Bu konsepsiya çərçivəsində vergiödəyicilərin məlumatlandırılması, maarifləndirmə məqsədi daşıyan tədbirlərin həyata keçirilməsi, vergi təbliğatı, müraciət və elanların tətbiqi kimi vergi orqanlarının fəaliyyət istiqaməti müəyyən edilib. Bununla yanaşı, 2007-ci ildə elektron bəyannamənin tətbiqi mühüm hadisə olub.
Bundan başqa, "Azərbaycan Respublikasında vergi inzibatçılığının təkmilləşdirilməsi Dövlət Proqramı (2005-2007-ci illər) çərçivəsində bir sıra layihələr həyata keçirilib: 195 nömrəli telefon məlumat xidməti yaradılıb, ölkə regionlarında 16 kompüter terminalı açılıb, 454 metodiki kabinet və ümumtəhsil məktəbi yaradılıb, nazirliyin rəsmi saytı üç dilə: Azərbaycan, ingilis və rus dillərinə tərcümə edilib, elektron vergi idarəsi yaradılıb, "bir pəncərə" vasitəsilə biznesin qeydiyyata alınmasına başlanılıb.