...

Türkiyə Azərbaycanla sərhəddə elektron gömrük idarəetməsinə keçəcək

Biznes və iqtisadiyyat xəbərləri Materials 25 Yanvar 2011 14:07 (UTC +04:00)

Azərbaycan, Bakı, 25 yanvar /Trend, müxbir A.Axundov/

Altı ay ərzində Türkiyə Azərbaycanla sərhəddə elektron gömrük idarəetməsinə keçəcək. Bu barədə çərşənbə axşamı Trend-ə Türkiyə Baş naziri yanında Gömrük üzrə Altkatiblikdəki yüksəkrütbəli mənbə məlumat verib.

"Sərhəddəki bütün gömrük məntəqələrində, eləcə də Naxçıvanla sərhəddə nəzarətin gücləndirilməsi və sənədlərin tərtibi prosesinin sürətləndirilməsi üçün elektron gömrük idarəetməsinə keçəcəyik. Bu zaman Azərbaycanda tətbiq olunan "bir pəncərə" prinsipindən də istifadə olunacaq, lakin daha təkmilləşdirilmiş variantda", - mənbə bildirib.

Onun sözlərinə görə, düzgün istifadə zamanı "bir pəncərə" prinsipi sənədlərin tərtibi prosesini daha da sadələşdirir və sürətləndirir, sərhəddə gözləmələrin müddətini azaldır və gömrük nəzarətini effektiv edir.

Azərbaycanda 2009-cu il yanvarın 1-dən dövlət sərhəddindəki gömrük-buraxılış məntəqələrində mallara və nəqliyyat vasitələrinə baxış zamanı "bir pəncərə" sistemi tətbiq edilib. Bu zaman əsas məqsəd mallara və nəqliyyat vasitələrinə baxış zamanı süni maneələrin aradan qaldırılması, idxal-ixrac əməliyyatlarının beynəlxalq tələblərə uyğun keçirilməsi üçün zəruri şəraitin yaradılmasından ibarətdir. Sərhəd-buraxılış məntəqələrində informasiya-kommunikasiya texnologiyalarının tətbiqi, eləcə də "bir pəncərə" prinsipinə keçid "elektron gömrüyün" yaradılması çərçivəsində həyata keçirilir.

2008-ci il noyabrın 11-də Azərbaycan Prezidenti 2009-cu il yanvarın 1-dən gömrük-buraxılış məntəqələrində mallara və nəqliyyat vasitələrinə baxış zamanı "bir pəncərə" prinsipinin tətbiq edilməsi haqqında sərəncam imzalayıb.

Mənbənin sözlərinə görə, Azərbaycan Dövlət Gömrük Komitəsi və Türkiyə Baş naziri yanında Gömrük üzrə Altkatiblik gömrük qanunvericiliyinin pozulmasına qarşı birgə mübarizə aparırlar.

"Biz azərbaycanlı həmkarlarımızla birgə pozuntuların aşkara çıxarılması və gömrük qanunvericiliyini pozanların yaxalanması üzrə əməliyyatlar keçiririk ki, bu da çox effektivdir", - mənbə bildirib.

Onun sözlərinə görə, Azərbaycan və Türkiyənin gömrük strukturları fevralda qarşılıqlı layihələri yenidən müzakirə edəcəklər.

"Hazırda ümumi sərhəddə sənədlərin tərtibi və qeydiyyatının sadələşdirilməsi, nəzarətin gücləndirilməsi və digər məsələlər üzrə bir sıra layihələr hazırlanma mərhələsindədir. Bunlarla əlaqədar fevralda azərbaycanlı gömrükçülərlə görüş gözlənilir. Görüşün yeri və tarixi hələ müəyyən edilməyib", - mənbə bildirib.

Türkiyə gömrüyünün məlumatına görə, 2010-cu ilin yanvar-noyabr aylarında Azərbaycan mallarının Türkiyəyə idxalı 783,691 milyon dollar təşkil edib ki, bu da 2009-cu ilin analoji dövrünün göstəricisini 13,67 faiz üstələyir. Yanvar-noyabr aylarında Türkiyədən Azərbaycana ixrac 1,387 milyard dollar olub. Bu da 2009-cu ilin analoji dövründəki göstəricidən 9,57 faiz çoxdur.

Xəbər lenti

Xəbər lenti