Azərbaycan, Bakı, 15 fevral /Trend, müxbir İ.Xəlilova/
2011-ci ilin yanvarında Azərbaycanda kənd təsərrüfatı məhsullarının istehsal həcmi 6,6 faiz, o cümlədən tərəvəz və bitkiçilik məhsulları 5,5 faiz, heyvandarlıq 6,7 faiz artıb. Bu barədə çərşənbə axşamı ölkənin Dövlət Statistika Komitəsindən məlumat verilib.
İlkin məlumatlara görə, 2011-ci ildə 915,3 min hektar sahədən payızlıq dənli bitkilərin, eləcə də 660,5 min hektar sahədən buğda, 254,7 min hektar sahədən arpa yığımı planlaşdırılır.
Azərbaycanda kənd təsərrüfatı sahəsində 33,9 min ton diri çəkidə ət, 118,3 min ton süd, 92,2 milyon ədəd toyuq yumurtası istehsal olunub. Ötən ilin yanvarı ilə müqayisədə ət istehsalı 5,1 faiz, süd 10,9 faiz, toyuq yumurtası 0,1 faiz artıb.
"Heyvandarlığın dinamik inkişafına vaxtında göstərilən zootexniki və baytarlıq tədbirləri, eləcə də cins mal-qaranın məhsuldarlıq keyfiyyətinin yaxşılaşdırılması istiqamətində görülən işlər müsbət təsir edib", - komitədən bildiriblər.