Azərbaycan, Bakı, 12 mart /Trend, müxbir Ü.İsmayılova/
"Turizm ili" çərçivəsində Azərbaycan Turizm İnstitutu yanında turizm sahəsində xidmət keyfiyyətinin yüksəldilməsi üçün texniki peşə məktəbi yaradılacaq. Bu barədə institutun rektoru Cəfər Cəfərov məlumat verib.
"Hazırda biz bu layihənin həyata keçirilməsi üçün zəruri işlər görürük", - Cəfərov deyib.
Onun sözlərinə görə, belə təhsil müəssisəsinin yaradılmasında əsas məqsəd fəaliyyəti ali təhsil tələb etməyən (orta və aşağı dairə) kadrların hazırlanmasıdır. Turizm sahəsindəki fəaliyyət növlərinin yalnız 20 faizi ali təhsilin olmasını tələb edir.
Cəfərov bildirib ki, yaxın vaxtlarda hökumətin institut yanında texniki peşə məktəbinin yaradılması haqqında qərarı açıqlayacağı gözlənilir.
"Biz artıq bu işə tam hazırıq", - institutun rektoru bildirib.
Onun sözlərinə görə, bu təhsil müəssisəsində Turizm İnstitutunun pedaqoqları dərs keçəcəklər. Lakin bu kifayət deyil, ona görə də institut turizm sahəsində ixtisaslaşan müəllimlər toplayacaq.
