Azərbaycan, Bakı, 16 mart /Trend, müxbir N.İsmayılova/
Azərbaycanda qızıl hasilatı ilə məşğul olan "Anglo-Asian Mining plc" şirkətinin səhmdarlarının tərkibində dəyişiklik baş verib. Bu barədə şirkətin çərşənbə günü yaydığı məlumatda deyilir.
"Şirkət 2011-ci il martın 11-də "RCF Management LLC"nin daha şirkətin nizamnamə kapitalında pay sahibi olmadığı barədə xəbərdarlıq alıb", - məlumatda deyilir.
2010-cu il mayın sonuna olan məlumata görə, "Resource Capital Fund III L.P." şirkətin səhmlərinin 5,89 faizinə (6 459 523 səhm) sahibdir. Nisbətən ən iri səhmdarlar səhmlərin 29,92 faizinə (32 796 830 səhm) malik olan Reza Vəziri, Xaqani Bəşirov - 16,5 faiz (18 087 758 səhm), Con Sununu - 9,79 faiz (10 734 540 səhm), "Limelight Industrial Developments Limited" - 3,68 faiz (4 038 600 səhm) şirkətidir. Göstərilən tarixə şirkətin cəmi 109 616 840 səhmi buraxılıb.
1998 -ci ildə yaradılan "Resource Capital Funds" özündə mineral resursların və coğrafi regionların şaxələnmiş çeşidləri üzrə yalnız dağ-mədən sektoruna investisiyalar qoyan mandatlı birbaşa investisiyaların özəl fondlarını birləşdirir.
"Anglo Asian Mining PLC" şirkəti 1997-ci ilin avqustunda Azərbaycan hökuməti ilə imzalanan PSA tipli məhsulun pay bölgüsü sazişi əsasında Azərbaycanın cənub-qərbində yerləşən altı - "Gədəbəy", "Ordubad", "Qoşa Bulaq", "Qızıl Bulaq", "Vejnəli" və "Söyüdlü" yataqlarının işlənməsi hüququna malikdir. Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.
İlk qızıl və gümüş 2009-cu ilin mayında "Gədəbəy" yatağından hasil edilib. Ümumilikdə, 2015-ci ilədək "Gədəbəy" yatağından 300 min unsiya qızılın hasil edilməsi planlaşdırılır.
Azərbaycan hökuməti və Azərbaycan Beynəlxalq Mədən Əməliyyatı Şirkəti arasında 30 llik müddətə imzalanan pay bölgüsünə dair sazişdə Azərbaycanın payı 51 faiz, Böyük Britaniyanın "Anglo-Asian Mining plc" şirkətinin payı isə 49 faiz təşkil edir.
