...

"Bank Melli Iran"ın Bakı filialının aktivləri il ərzində 27 faizdən çox artıb

Biznes və iqtisadiyyat xəbərləri Materials 17 May 2011 14:44 (UTC +04:00)

Azərbaycan, Bakı, 17 may /Trend, müxbir N.İsmayılova/

"Bank Melli Iran"ın Bakı filialının aktivləri 2010-cu il ərzində 27,4 faiz artaraq 53,39 milyon manat təşkil edib. Bu barədə bankın çərşənbə axşamı rəsmi mətbuatda dərc edilən balans hesabatında deyilir.

Ötən il bank tərəfindən kredit təşkilatlarından 20,285 milyon manat alınıb. Bu, ötən ilin analoji dövrünün müvafiq göstəricisindən 5 faiz azdır. Müştərilərə verilən kreditlər 28,6 faiz azalaraq 5,76 milyon manat təşkil edir.

Bankın məcmu öhdəlikləri il ərzində 46,4 faiz artaraq 39,8 milyon manat təşkil edib. Bunlardan "Bank Melli Iran"ın banklar və dövlət orqanları qarşısında öhdəlikləri 2010-cu ilin sonuna 35,3 milyon manat, müştərilər qarşısında 4,39 milyon manat, digər öhdəliklər 82,58 min manat təşkil edib.

İlin yekunları üzrə bankın məcmu kapitalı 13,59 milyon manat olub. Bank ili 1,05 milyon manat həcmdə itki ilə başa vurub. 2009-cu ilin yekunları üzrə bankın gəliri 693,77 min manat təşkil edib.

"Bank Melli İran" İranın ilk milli bankıdır. O, 1927-ci ildə Məclisin (İran parlamentinin) sərəncamı ilə yaradılıb və o vaxtdan İranın ən nüfuzlu banklarından biridir.

"Bank Melli İran" İranda və Yaxın Şərqdə 3 300 şöbə və 43 min əməkdaşa malik ən iri kommersiya bankıdır. Bank 18 beynəlxalq filiala və 11 ölkədə xidmət məntəqəsinə malikdir. "Bank Melli İran"ın Bakı filialı 1993-cü ildə yaradılıb.

Mayın 17-nə olan rəsmi məzənnə 0,7905 AZN/USD təşkil edir.

Xəbər lenti

Xəbər lenti