Azərbaycan, Bakı, 24 may /Trend, müxbir N.İsmayılova/
Azərbaycan hökuməti 2011-ci ildə sosial ipotekanın maliyyələşdirilməsinə xərcləri 6 milyon manat artırmağı planlaşdırır. Bu barədə "Azərbaycan Respublikasının 2011-ci il dövlət büdcəsi haqqında" qanuna dəyişikliklərin edilməsi barədə" qanun layihəsində deyilir.
Əvvəllər dövlət büdcəsində bu məqsədlər üçün ölkənin Mərkəzi Bankı yanında Azərbaycan İpoteka Fonduna 14 milyon manatın ayrılması planlaşdırılmışdı. Büdcə proqnozlarına düzəlişlər çərçivəsində sosial ipotekanın maliyyələşdirilməsinin həcmini 42,8 faiz - 20 milyon manatadək artırmaq təklif olunur.
Bu artırmanın məqsədi 2011-ci ildə kreditlərin bu növünə yüksək tələbatın ödənilməsi məqsədilə (kreditlərin verilməsi mexanizmlərinin sadələşdirilməsi, kredit məbləğinin yüksək həddinin artırılması) sosial ipotekanın verilməsi şərtlərinin dəyişdirilməsidir. Eyni zamanda, bu onunla bağlıdır ki, Azərbaycan Prezidenti İlham Əliyev ölkə əhalisinin aztəminatlı təbəqəsinin həyat səviyyəsinin yaxşılaşdırılmasına böyük əhəmiyyət verir.
Yanvar-apreldə AİF xətti ilə 26,4 milyon manat məbləğində ipoteka krediti verilib. Bankların əvvəllər verdikləri yenidən maliyyələşdirilən kreditlərin ümumi həcmi 21,1 milyon manat təşkil edib. 2011-ci il dövlət büdcəsində sosial ipotekanın maliyyələşdirilməsinə nəzərdə tutulan 14 milyon manatdan ilin əvvəlindən 3,6 milyon manat ayrılıb.
Hazırda AİF-in şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Güzəştli kreditlər üçün ilkin ödəniş 15 faiz, adi kreditlər üçün isə 20 faiz təşkil edir.
Kreditlər milli valyutada - manatla və yalnız Azərbaycan vətəndaşlarına verilməlidir, ipotekanın predmeti yalnız mənzil və şəxsi evlər ola bilər, ipoteka kreditinin məbləği ipoteka üçün girov qoyulan daşınmaz əmlakın bazar qiymətinin 85 faizini ötməməlidir, kreditə görə aylıq ödəniş borcalanın aylıq gəlirinin 70 faizini ötməməlidir.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı üç il iş təcrübəsi olan dövlət qulluqçularına, elmlər namizədləri və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin maksimum üç il xidmət stajı olan hərbçilərə şamil edilir.
Güzəştli ipoteka krediti alan hər ailə bundan yalnız bir dəfə istifadə edə bilər.
Hazırda AİF-in 22 müvəkkil bankı var.
