Azərbaycan, Bakı, 6 iyun /Trend, müxbir A.Axundov/
Azərbaycan üçün öz bazarında Türkiyədə bəyənilmiş sığorta modelləri və məhsullarını diqqətlə öyrənmək və seçərək tətbiq etmək məqsədəuyğun olardı. Bu barədə Trend-ə Azərbaycanın "Paşa Sığorta" şirkətinin idarə heyətinin sədri Nofəl Rzayev bildirib.
Rzayev mayın 25-27-də İstanbulda keçirilən Beynəlxalq sığorta konfransında iştirak edib.
"Bu gün Türkiyənin sığorta bazarının 70 faizi və Türkiyə bazarının sığorta dövriyyəsinin 65 faizi aparıcı beynəlxalq maliyyə-sığorta institutlarına məxsusdur. Türkiyənin sığorta sektorunda Qərb kapitalının belə yüksək səviyyəsi öz növbəsində ölkənin maliyyə siyasətinin ciddi tənqidi üçün əsas olmağa xidmət edir", - Rzayev bildirib.
Onun sözlərinə görə, halbuki Qərb sığortaçıları Türkiyəyə təkcə kapitalla deyil, həm də sığorta nou-houları və texnologiyalarla gəliblər ki, bu da öz növbəsində şübhəsiz ki, bugünkü Türkiyə bazarının nisbətən daha stabil regional bank-sığorta mərkəzlərindən birinə çevrilməsində çox mühüm rol oynayıb.
"Ona görə də bizim üçün Türkiyədə bəyənilmiş sığorta modelləri və məhsullarını diqqətlə öyrənmək və seçərək tətbiq etmək daha məqsədəuyğun olardı. Digər tərəfdən, Türkiyə bazarında təmsil olunan aparıcı Qərb sığortaçıları Azərbaycan, Türkmənistan və Qazaxıstanın aparıcı sığorta şirkətlərindən təkrar sığorta üzrə risklərin qəbulu imkanlarına ciddi baxmağa hazırdırlar. Türkiyə bazarının etibarlı ödəniş və tarif rəqabətqabiliyyətliyini nəzərə alaraq, tərəfimizdən türk bazarının təkrar sığorta güclərindən istifadə imkanları ciddi şəkildə öyrənilməlidir", - Rzayev bildirib.
2010-cu ildə dünyada ən iri sığorta şirkətlərindən biri olan AXA Group şirkəti Azərbaycan bazarına daxil olub. Bu şirkət Türkiyənin sığorta bazarında əsas rollardan birini oynayır.
Bu gün Azərbaycanda 28 sığorta şirkəti (eləcə də beşi xarici kapitalın iştirakı ilə), bir təkrar sığorta və beş broker şirkəti (dördü xarici kapitalın iştirakı ilə) fəlaiyyət göstərir.