Azərbaycan, Bakı, 27 dekabr /Trend, müxbir E.İsmayılov/
Noyabrda Azərbaycanda nəqliyyat sahəsi xidmətləri üzrə tariflər oktyabra nisbətdə 0,4 faiz artıb. Bu barədə çərşənbə axşamı Trend-ə Dövlət Statistika Komitəsindən məlumat veriblər.
Noyabrda ölkə daxilində dəmiryol nəqliyyatı üzrə 10 ton yükün hər kilometrinə görə orta tariflər 25 faiz azalıb. Öz növbəsində, ölkəyə dəmiryol nəqliyyati ilə gətirilən yüklər, tranzit yükləri və ölkədən ixrac edilən yüklər üzrə tariflər müvafiq olaraq, 5,1 faiz, 8,1 faiz və 21,2 faiz artıb.
Ümumilikdə, noyabrın yekunlarına əsasən, dəmiryol nəqliyyatı ilə beynəlxalq sərnişindaşıma tariflərinin 6,6 faiz artımı müşahidə edilib.
Bununla yanaşı, noyabrda MDB ölkələri üzrə 1 ton yükün hava nəqliyyatı ilə daşınma tarifləri 3,3 faiz azalıb. Uzaq xarici ölkələrə hava nəqliyyatı ilə sərnişindaşıma tarifləri 3,3 faiz, MDB ölkələrinə isə 3,9 faiz artıb.
Dəniz nəqliyyatı ilə 1 ton yükün daşınması üzrə tariflər 6,5 faiz artıb.
Noyabrda boru kəməri ilə neft nəqli üzrə tariflər oktyabra nisbətdə 0,4 faiz yüksəlib.