Azərbaycan, Bakı, 12 yanvar /Trend, müxbir A.Axundov/
2012-ci ildə Azərbaycanda lizinq üzrə faiz dərəcələrinin azalması gözlənilir. Bu barədə cümə axşamı Trend-ə Azərbaycan-Pakistan "MCB Lizinq" şirkətinin idarə heyətinin sədri Ramal Cəfərov deyib.
"Azərbaycan iqtisadiyyatının beynəlxalq bazarlara inteqrasiyası, ölkənin maliyyə vəsaitlərinin artması, əhalinin gəlirlərinin yüksəlməsi və digər amillər bazarda pul kütləsinin artmasına səbəb olacaq ki, bu da lizinq üzrə faizlərə təsir edəcək", - Cəfərov bildirib.
Onun sözlərinə görə, lakin faizlər tədricən azalacaq.
"Bu gün lizinq bazarında məhsuldan asılı olaraq, orta faiz dərəcəsi 18-22 faiz arasında dəyişir. Düşünmürəm ki, bu il azalma 3 faizdən çox olacaq. Belə ki, bu, tədricən baş verməlidir. Böyük azalma dövlətin və ya çox iri investorun müdaxiləsi zamanı baş verə bilər", - Cəfərov qeyd edib.
Azərbaycanda 24 lizinq şirkəti rəsmən qeydiyyata alınıb, lakin onlardan 9 lizinq şirkəti və lizinq xidmətləri göstərən banklar real olaraq fəaliyyət göstərir.
